LPS Pro Fight - Out; LPS Pro Fight - In Kan R&J leh boxer turte hi tumah an phuar kan ring lo - Sawma

LPS Vision chuan nimin khan Aizawl Press Club-ah LPS Professional Fight chungchangah press mite an kawm a, Mizoram Boxing Association (MIZBA) nena an inkar boruak an sawifiah bakah inelna hmachhawn turin boxer 193-in hming an ziahluh tawh thu an puang.

LPS Vision hian kum 2009 aṭanga 2019 thleng khan MIZBA nena ṭangkawpin hlawhtling takin LPS Promotional Fight an buatsaih tawh ṭhin a, LPS Pro Fight tia hriat lar a ni. Tun ṭuma an buatsaih tur hi LPS Professional Fight a ni thung a, LPS Pro Fight tiin an sawi chhunzawm ang. Inelna hi hming lam pum bakah a kawh tum hrang a ni a, a hming lam tawi erawh a la inang dawn tihna a ni.

Pro Fight hmasa
Tualchhung boxing inelna ngaihhlut LPS Pro Fight hi kum 2009 aṭanga ṭan kha a ni a, inelna ṭan kum hian boxer 318 zet an tel. Pro Fight hmang hian boxer ṭhahnem tak chherchhuah a ni a, Mizoramin boxing-a hma a sawnna kawngah a thawh hlawk hle.

Inelna hi LPS leh Mizoram Boxing Association (MIZBA) ṭangkawpin an buatsaih a ni a, kum 2019 thleng khan an thawk dun. An thawh dun hnuhnung berah pawh hian mipuiin an hlut hle.

March 12, 2019 khan lightweight title chu belt hreng lai Lalrinawma (Agoa) leh Khuangthing tlangval Vanlalawmpuia ten an inchuh. Agoa chu split decision-in a chak a, mipuiin an pawm loh avangin bottle leh thil chi hrang hrang an vawm lut.

Boruak san lai takin LPS neitu leh Pro Fight chairman Lalsawmliana Pachuau chuan, "Tun bak hi LPS Pro Fight kan ti tawh lo ang," tiin a sawi. January 22, 2021 khan Mizoram sports minister Robert Romawia Royte-in a pisaa LPS Fight Night chungchangah thutharthendartute a kawm ṭumin Sawma hian LPS Pro Fight awm tawh loh tur a sawi leh bawk.

Pro Fight thar
LPS neitu Sawma chuan, "LPS Promotional Fight-ah kha chuan MIZBA nen risk kan la a, amateur-ah chuan tawnzau nena inhnek ngai mah se kawr ha loin kan inhnektir. India ram thuneitu sang zawk aṭanga sawiselna kan tawng a nih chuan kan titawp mai ang kan ti a, mahse a hmunah te min rawn telpuiin ṭha an ti hle. Tunah erawh chuan professional fight tak tak a ni tawh dawn a, LPS Boxing Promotions hnuaiah khelh a ni ang," tiin a sawi.

LPS Boxing Promotions hi India rama professional boxing lama thuneitu Indian Boxing Council-ah an inziaklut a, professional boxing buatsaih thei turin dan ang thlapin phalna an nei. Tun ṭuma LPS Pro Fight-ah pawh hian semifinal chin chu professional boxer-te record dahna hmunpui BoxRec-ah dah a ni dawn.

Inelna hi August 31 aṭanga October 1, 2022 chhungin R. Dengṭhuama Indoor Stadium, Mualpui, Aizawlah neih tura ruahman a ni. Tel tum tan August 20 thlengin LPS Office, Zarkawtah entry form theh luh theih a ni. Nimin thleng khan Mizoram, Manipur leh Assam aṭangin boxer 193-in an theh lut tawh a; August 26, Zirtawpni zing dar 8:00-ah Zarkawt Recreation Centre, Aizawlah tel tumte an inbuk ang.

BFI leh MIZBA thuchhuah
India rama amateur boxing thuneitu sang Boxing Federation of India (BFI) chuan April 21, 2022 khan thuchhuah an siam a, anmahni leh an hnuaia unit (MIZBA etc) te hriatpui loh inelnaa tel boxer, coach, R/J te chu an hnuai inelnaa tel thei lo turin thuchhuah an siam.

MIZBA pawhin BFI thuchhuah zul zuiin July 18, 2022 khan thuchhuah an siam leh bawk. Mizoram chhung amateur boxing-a thuneitu sang ber MIZBA hian August 9, 2022 khan thuchhuah an siam leh a, an thuchhuahah chuan, "Tun dinhmunah chuan Mizoram Fight Night chauh hi Mizoram Boxing Association chuan approval a pek a ni tih kan inhriattir a ni e," tih a chuang. Mizoram Fight Night hi MIZBA hnuaia mi Aizawl District Boxing Association leh Zonet ṭangkawpin an buatsaih tur a ni a, kumin November thlaa neih tur niin amateur boxing inelna a ni dawn.

MIZBA thuchhuah aṭanga a lan dan chuan LPS Pro Fight-a tel boxer-te chu MIZBA hnuaia inelnaah an tel thei dawn lo a, chumi awmzia chu Mizoram aiawhin an khel thei dawn lo tihna a ni.

LPS leh MIZBA inkar
LPS hi Cable TV chauh ni tawh loin anmahni puala professional boxing buaipui thei turin Boxing Promotion an din tawh. MIZBA hi amateur boxing-ah chuan Mizorama thuneitu sang ber an ni thung a, boxing buaipuitu ve ve ni mah se thil hrang anga sawi theih a ni.

MIZBA hian Pro Fight inelna hi a hriatpui duh lo a nih chuan tun ṭum inelnaa tel zawng hi chu MIZBA inelna chauh ni loin Mizoram aiawhin National Boxing C'ship bakah BFI hnuaia inelna dangah pawh an tel thei dawn lo tihna ni. Mizo boxer ṭhahnem tak tan Services, Railways etc-a luhna kawng a ping dawn tihna a ni a, India ram aiawh pawhin thlan theih an ni lo ang.

Chutihrualin Olympic chuan Rio 2016 aṭang khan professional boxer tel a phal tawh a, BFI pawhin August 29, 2019 khan professional boxer-te BFI inelnaah tel an rem tih thu an puang.

LPS Pro Fight organising secetary Thangkhuma (T-a) chuan, "MIZBA nen inremna kan neih theih nan theihtawpin hma kan la a, inremna neih theih kan duh hle a ni. Thawh dun tumin lehkhain kan ngen a, professional tidanglama technical thil sawi tlang turin kan ti a, an pawm hnuah an pawm lo leh a. Boxer-ten an tawrh loh nan an hriatpuina ang tala technical lama an duh anga kalpui theih a ni em, tiin President ka len chilh a, ṭha taka min chhan hnuah thuchhuah a rawn siam," tiin thil awm dan a sawifiah.

LPS hian MIZBA nen Pro Fight an buatsaih hnuah hlawhtling takin Professional Fight an buatsaih leh tawh. March 4, 2021 khan R. Deng-ṭhuama Hall-ah Lalrinsanga Tlau leh Eric Quarm (Ghana) te an inhnek a, hemi hnu November 27, 2021 khan Dawrpui Multipurpose Hall-ah NT Lalbiakkima'n IBA Inter-continental title a humhim leh bawk.

Heng professional fight hoah hian MIZBA hruaitu inlan loh chungchang zawhna chhangin LPS neitu Sawma chuan, "MIZBA nen kan inkarah inngeih lohna a awm lo. Sangtea te nena inhnek ṭum khan MIZBA hruaitute zawng zawng entry card pek vek an ni. Amaehrawhchu an rawn kal loh avangin ka phone zui a, professional fight-a inlan hi a inthlahrunawm, an ti. Biakkima te inhnek ṭum khan kan la sawm tho a, Pu Nienga leh Pu Suakchhinga te an rawn inlan a, kan karah hian engmah chhia a awm lo. Inngeihna lohna a awm lo a, min huatna tur pawh ka hre lo," tiin a sawi.

Sawma chuan sawi chhunzawmin, "MIZBA nen hian ṭha takin kan thawk dun a, amaherawhchu BFI lehkha bikah khan unauthorised organisation tih kha professional nia ngaih palh a nih ka ring. Kan lehkha hi ziakin min chhang mai ṭhin lo a, phone-in kan va zawt chawp leh ṭhin a. MIZBA thuchhuah kan hmuh khan kan duh danin kan kal mai a ngai dawn a nih hi kan tia. Kan beisei dan chuan kan R&J turte, kan boxer turte hi tumah an phuar kan ring lo. A chhan chu unauthorised organisation ni loin professional a ni," a ti.

LPS lam sawifiahnaah chuan BFI pawmpui loh pawl hi professional huang lam ni loin amateur pawl tho a ni. Chu chu Indian Amateur Boxing Federation (IABF) a ni a, IABF hriatpui inelnaa tel hi BFI-in a pawm lo, niin an sawifiah a ni.

LPS Pro Fight 2022
Thlirna Tawi
LPS Pro Fight 2022 chu August 31 aṭanga October 1, 2022 chhungin R. Dengṭhuama Indoor Stadium, Mualpui, Aizawlah neih tura ruahman a ni. August 20 thleng LPS Office, Zarkawtah entry form theh luh theih a ni ang.

KHELH DAN TUR
Weight hrang panga Fly (kg 48-52), Bantam (kg 52-55.3), Feather (kg 55.3-59), Light (kg 59-63.5) leh Welter (kg 63.5-70)-ah ṭhen a ni.
Boxer tel turte hlawm hniha ṭhen hran an ni dawn a, tawn hriat nei loten a tir aṭangin an khel ang a, boxing inelna hrang hranga hnuhma nei tha tawhte stage sang aṭangin an tel ve thung ang.

LAWMMAN
Organising Committee-in lawmman pawisa fai Rs 5,50,000 a sem chhuak dawn a; weight hrang pangaa champion theuhin Rs 50,000; pahnihnain Rs 20,000; semifinal-a tlaten Rs 10,000 leh quarterfinal-a tlaten Rs 5,000 an dawng ang.
KT Enterprise chuan boxer ṭha ber hnenah lawmman tha tak a pek dawn bakah boxer mi mal lawmman dang, referee leh judge ṭha ber lawmman a tum dawn. Zanah vek inhnek huaihawt tum a ni a, inhnek zan apiangin GIG Motors Figter of the Night lawmman sem ziah a ni ang.
Ring Announcer, Referee leh Judge-in zan khatah lawmman Rs 1,500 zel an dawng ang.