MWA-in Jeremy-a an lawmpui

Mizoram Weightlifting Association (MWA) chuan Thawhlehni tlai khan Jeremy Lalrinnunga lawmpuina hun an hmang. Mizoram Weightlifting Academy, Ramhlun Sports Complex-ah sawm bik tlemte nen hun an hmang a ni.

Commonwealth Games gold medalist Jeremy-a chuan, "Weightlifting hi game awlsam tak a ni hran lo, thleng sang tur chuan training neih ṭhat a ngai hle. Tun ṭuma medal la tur pawh hian kum hnih chhung Mizorama rawn haw loin ka inbuatsaih.

"Mizo naupang talent nei ṭha tak tak an awm tih ka hria, an theihna hi tih pun ni se ka duh. Theihna bakah nungchang a pawimawh a, hmunhma ṭha leh kaihruaitu ṭha an mamawh bawk," tiin a sawi.

Ainawn Veng (Govt. Complex) tlangval Jeremy-a hian kumin tawp lamah hian World Championship a hmachhawn leh dawn, chumi hma chuan a hliam enkawl turin United States lamah hun a hmang ang.

Mizoram sorkar chuan Commonwealth Games medalist Jeremy Lalrinnunga leh Lalremsiami Hmar te pualin lawmna hun a buatsaih tur thu an puang tawh a, mahse a hun tur tak erawh tihchian a la ni lo.

Ruahman dan chuan August 22, Thawhṭanni hian Jeremy-a'n Mizoram a chhuahsan ang.