Raducanu lakah Serena a chak lo
A chawlh tur thu a sawi hnuah Serena Williams a che fuh thei rih lo. Nimin zing Cincinnati Open inkhelah Serena hi Emma Raducanu lakah a chak lo, hneh nei loin first round-ah a zinkawng a tawp nghal tihna a ni.
Kum 40 mi Serena hian US Open zawh hnuah tennis chawlhsan a tum. A chawlh hmain result ṭha neih chu a duhthusam a ni ngei ang, mahse British tleirawl lakah hian 6-4, 6-0 in a chak lo zawkah a ṭang.
Grand Slam vawi 23 champion tawh Serena hi a tir aṭangin a che hleithei lo, kum 19 mi lek Raducanu hian a naupan lai aṭanga a inkhel a en tawh Serena hi kawng tinrengin a ngam, tun ṭum atan chuan chak phu zawk a ni.
Hma lam a thlir
Season hmasa khan Raducanu hian rin loh tak maiin US Open nomawi a chawi a, a hnu lamah erawh result ropui leh chhuan tur tak a nei lo. Tun inelna bul a ṭan dan erawh a ṭha hle, a match lehpekah chuan Victoria Azarenka a hmachhawn ang.
World number 13 Raducanu chuan, "Serena nen hian kan vanglai a rual lo hle, a hun tawp lam ka nang ve hman chauh pawh hi ka lawm, ani nena tennis khelh dun ringawt pawh hi ka tan chuan lawmna tur a tling.
"A nihna takah chuan point hmasa ber aṭang khan ka hlauthawng rilru hle, eng hunah pawh Serena hi chu a tho chhuak thei tih ka hria," a ti a, a player ngaihsan tak a hneh theih avangin match lehpek atan inrintawkna a neih thu a sawi bawk.
Hun tawp a hnai
Season khat chhunga Grand Slam hnuhnung US Open chu August 29 aṭangin New York khawpuiah khelh a ni dawn. Hard court inelna lian a zawh hunah Serena hian chawlh a tum, chawlh a tum thu a sawi hnuah match hnih khel leh tawhin a chak lo ve ve.
Tournament khelhna hmun leh pawn lamah player tam takin Serena thlahna leh ropui an tihzia an sawi deuh reng a, tun hnaiah result nei ṭha lo mah se a sulhnu hluite chu tennis khawvel luah thartu a ni leh mek.
Kum 40 mi Serena hian Grand Slam title 23 a la a, champion hnem ber Margaret Court-i record chu nomawi pakhatin a um phak lo. Fa a neih tawh avangin a tan inkhelh reng a harsa, a kum a tam tawh bawk avangin record thar chu a siam thei dawn ta lo a ni.
Osaka leh Gauff
US Open inbuatsaihna Cincinnati Open-ah hian, hmeichhe player langsar Naomi Osaka leh Coco Gauff te pawh hneh nei loin an match hmasa berah an tla nghal - an tan New York khawpuia khelh ṭhat thut a harsa mai thei.
French Open finalist Gauff hi Marie Bouzkova nen an inkhel a, 7-5, 1-0 a nih laiin hliam vangin a khel chhunzawm thei lo. Kum 18 mi Gauff hian tun hnai khan doubles huangah number 1 dinhmun a chelh a, singles lamah erawh result ṭha a nei zui lo.
Inkhel dangah Osaka chu Zhang Shuai lakah 6-4, 7-5 in a chak lo. Grand Slam vawi li champion tawh Osaka hian service nei ṭha zawk mah se, break point vawi li a hmuh zinga vawi khat chauh a chhawr ṭangkai thei, a service vawi thum a hloh thung.