FIFA-in India a ban Eng nge a nghawng dawn?

Football khawvela thuneitu sang ber FIFA chuan, pawn lam mi inrawlh avangin All India Football Federation (AIFF) chu a 'ban' rih a, mi tam tak rilrua zawhna lian ber chu hian hian eng ang takin nge India-ah nghawng a neih ang? tih chu a ni.

Hetiang boruak karah hian Indian football chuan nimin khan chanchin lawmawm hriat tur a nei a, Supreme Court chuan nimin khan sorkar laipui chu AIFF hremna hlih a nih theih dan tur ngaihtuah turin a hriattir.

FIFA-in India a hrem dan hi, "tiamchin awm lo," tih a ni a, chumi awmzia chu he thuziak i chhiar lai ngei pawh hian ban an nihna hi hlih a lo ni daih tawh thei a, an la buai zual chauh mai thei bawk!

Vanglaini thudawn danin FIFA hotute leh India sorkar chuan nimin khan indawrna an nei ṭan tawh a, hei hi Indian football tan chuan chanchin lawmawm a tling.

FIFA a induh
Infiamna khawvela pawl lian ber an ni miau a, FIFA hi a induhtawk - kum 2022 chhunga a budget pawh dollar maktaduai 4,666 lai a ni a, he pawl hian football pawn lam miin thu an rawn neih ve dawn chuan India ban hi a hreh lo.

Supreme Court-in AIFF enkawl hna thawk tura a ruat Committee of Administrators (CoA)-in FIFA-in India a ban mai theih thu an hre lawk a, mahse, CoA hian State FA duhdan kalhin AIFF constitution thar an duang a, FIFA-in India a hrem ngam an ring lo - a ni mai thei!

Mahse, FIFA-in a hnuaia State FA-te thlavang hauh turin tih hreh a nei lo a, India market-a sum tam tak anga lang hi FIFA tan a member-te duhdan meuh hnuchhawna it turin a tam tawk lo.

India-in October 11-a FIFA Under-17 Women's World Cup a thlen dawn avangin ṭhenkhat chuan FIFA hian India a hrem ngam loh an ring a, mahse, chawpchilh tak pawha he inelna thlen châk an awm ṭeuh avangin FIFA tan ngaihtuahna tibuai pha thil a ni tlat lo.

India tan buaina
AIFF-in India a hremna tuar hmasa ber chu Indian Women’s League champion Gokulam Kerala an ni a, anni hi Tashkent, Uzbekistan-ah AFC Women’s Club Championship khel turin an awm mek.

Mahse, Asian Football Confederation lam chuan Kerala club hi inelnaa an tel theih loh thu an hrilh tawh. Hei chauh a ni lo - FIFA U-17 Women's World Cup thlen tur chu India hian an thleng thei dawn lo bawk.

India rama football league zawng zawng chu FIFA hriatpui loh an ni nghal a, chumi awmzia chu Asia khawmualpui inelnaa inlan tur Indian club-te chu an inlan thei tawh dawn lo a, AFC Cup-a September 7 zana inlan tur ATK Mohun Bagan pawh an inlan thei dawn lo.

Indian club-te chuan ram pawn player an lalut thei tawh dawn lo bawk a, ISL club zingah foreign player neih theih zat la nei lo an awm a nih chuan an bazar thei tawh lo tihna a ni nghal - hetihrual hian lakluh tawh sa ram pawn player erawh an la khel thei reng thung.

National team
September 6-19 inkar hian SAFF Women's Championship chu khelh tur a ni a, Nepal-a neih tur inelnaah pawh hian India hmeichhe team tan tel ve a rem dawn lo a, champion ngun ber India (5) tel loin inelna a hlu lo sawt dawn.

India mipa team chu September thlaa friendly match nei tura tih an lo ni tawh a, ruahmanna hmasa ang chuan September 24-ah Singapore nen an inkhel ang a, September 27-ah Vietnam nen an inkhel leh bawk ang.

Blue Tigers friendly match hnih hi Thong Nhat Stadium, Ho Chi Minh City-ah neih tur a ni a, mahse, a dawn hnaih thlenga FIFA hremna hi hlih a nih loh chuan India hian friendly match hi an khel thei dawn lo.

A tawi zawnga sawi chuan FIFA hremna hi India tan chuan a na takzet a, FIFA-in a hloh tur aiin India-in a tawrh tur hi a buk a rit fe zawk - hremna hlih thuai a nih theih dan ngaihtuah hi India tana pawimawh ber chu a ni.

Buaina chinfelna
August 15, zanlai pelh khan FIFA chuan AIFF an suspend thu hi an puang a, FIFA secretary general Fatma Samoura-i chuan FIFA-in India a ban lailawk thu hi AIFF secretary general lailawk Sunando Dhar hnenah lehkhain a thawn a, phek hnih a khatin a ziak.

Samoura-i lehkhaah hian FIFA-in AIFF an ban thu ringawt a inziak lo a, hremna hlih theih a nih dan a inziak tel.

FIFA chuan CoA leh an hnuhma zawng zawng thai reh an phût a, AIFF chu amaha inrelbawl tura chhuah zalen (CoA leh SC thunun loh) an phût a, AIFF general body (state FA kal khawm) pawmpui thlap AIFF constitution anga kalpui an phût tel bawk - hengte hi a thlen theih chuan FIFA hian AIFF a hremna hi a hlip thei ang.

Nimin khan Supreme Court chuan CoA leh AIFF buaina a ngaihtuah chhunzawm a, India sorkar chu FIFA-in India a hremna rang taka hlih a nih theih nana hma la turin a hriattir a, Thawhṭanniah hearing neih chhunzawm tur a ni.

SC chuan India-in FIFA U17 World Cup a thlen ngei theih dan tur ngaihtuah turin sorkar chu a hriattir a, hetihrual hian FIFA-in AIFF a hremna a hlih theih dan tur chungchang erawh chiang taka sawilan a awm lo thung.

Thil thlen dan
• Kum 2017-a AIFF inthlanna chu National Sports Code nen a inmil lo tiin sports activist leh lawyer Rahul Mehra chuan Delhi High Court-ah a khing a - thlan tlinte kum chungchangah te, term hman theih zat leh thil dangah National Sports Code kalh tiin a khing. Delhi High Court hian AIFF inthlanna pawh chu dan kalhah a puang ve nghal.
• AIFF-in tlawm an tum bik lo a, Delhi High Court rorel dan chu duh loin Supreme Court lamah an kal. SC hian 2017-ah vek National Sports Code mila AIFF dan (constitution) thar duang turin CoA a ruat a, Chief Election Commissioner hlui Dr SY Quraishi leh Indian football team captain hlui Bhaskar Ganguly ruat an ni.
• Mahse, SC-in CoA-a a ruat pahnih hian hma an la mai lo a, kum 2017-a thlan thar an nih avanga an khin AIFF president Praful Patel leh a thawhpuite hun pawh a tawp hman a, December 2020 khan an term hi a tawp.
• AIFF president Praful Patel-a'n phakar a chhuah a, "AIFF-in dan thar a la nei lo, SC thu lo chuan inthlan theih a ni lo," tiin inthlan a huaihawt lo a, President hna a chelh chhunzawm.
• Praful Patel-a bang duh lo hi Minerva Punjab FC neitu Ranjit Bajaj chuan a hrethiam lo a, Indian football-a thawm nei na ve tak hian Supreme Court-ah Praful Patel a khing.
• May 18, 2022 khan SC chuan Bajaj-a'n Patel a khinna hi a ngaihtuah a, amah leh a thawhpuite chu AIFF aṭangin a chawlhtir nghal a, AIFF enkawl turin CoA member turin Supreme Court judge hlui Justice AR Dave chu a ruat belh bawk.
• CoA-in AIFF inrelbawlna kalpui hna an thawk a, State FA aiawh mi pasarihte nen an indawr zui a, mahse, FIFA chuan pawn lam mi (third party - CoA) in football inrelbawlna an kalpui chu an duh lo.
• FIFA-AFC team chuan suspend-na lehkha nen June thla khan India an rawn kal a, mahse, State FA-in CoA thawhpui an pawi tih loh avangin India chu ban an la ni lo. FIFA chuan July 31-a constitution thar nei hman tur leh, September 15 hmaa inthlan nei hman turin a hriattir thung.
• Mahse, CoA-in State FA aiawhte nena an indawrna hmasa palzutin, an duhdanin thil tam tak an kalpui zui a, constitution tharah chuan Vice President panga awm ṭhin an tibo a, Executive Committee member 10 awm ṭhin chu pangaah an tihniam a, player chawl tawhte vote neih theih dan an duang bawk.
• July 6-ah CoA leh State FA aiawhte indawr leh mah se, an thu a inhmu thei lo a, State FA lamin an lungawi lohna SC-a thlen vel an rel a, July 16 khan CoA chuan an constitution duan chhin chu SC-ah an thehlut thung.
• SC chuan August 3 khan CoA constitution duan chhin chu a ngaihtuah a, dan siam zingah inthlanna kalpui dan tur chin chu a pawm a, thla thum atana hruaitu lailawk thlang tur leh, FIFA Under 17 Women's World Cup neih zawhah thil dangte chu ngaihtuah leh a, hruaitu pawh thlan ṭhat leh turin a rel ta a ni.
• FIFA-in football pawn lam miin football inrelbawlna dan an duang chu an lawm lo a, August 15 zanlaiah khan India chu FIFA member aṭanga a ban lailawk thu a puang ta a ni.