Medvedev tan a harsa lo

Daniil Medvedev chuan US Open inbuatsaihna a nei ṭha dawn niin a lang. Nimin zing khan Western & Southern Open-ah a match hmasa ber a khel a, a khingpui Botic van de Zandschulp chu 6-4, 7-5 in a hneh.

World number 1 Medvedev hian Dutch player lakah fiahna a hmachhawn dawn niin a lang hman, mahse hun pawimawh laiah zel a khingpui service a chhuhsak thei a, player ṭha zawk a nihna a lantir thei.

Russian tlangval chuan, "Set khatna kha chu ka khel ṭha thawkhat viauin ka hria, a hnuhnung zawkah erawh set la tur chuan vanneihna ka mamawh tel. Chutihrualin tournament tir lamah hi chuan thil a harsa ve ṭhin bawk," tiin a sawi.

US Open champion lai hian a match lehpekah chuan Tommy Paul leh Denis Shapovalov inkhela chak zawk a hmachhawn leh ang, a chak chho zel a nih chuan Medvedev hi Montreal quarterfinal-a a ngam loh Nick Kyrgios nen an inhmachhawn leh thei ang.