Argentina leh Brazil inkhel dawn lo - AFA

Argentine Football Association (AFA) chuan, an ṭhenawm Brazil nen World Cup qualifier an khelh zawh loh, khelh chhunzawm leh tura tih chu an khel dawn lo tih an sawi - ram pahnih hi Qatar pan turin an tling chiang tho a ni.

Nikum September 5 zing karah khan Brazil hian Argentina an lo mikhual, kha tih hunlai khan Brazil chuan an rama zin lut tur tan hripui chungchanga inkaihhruaina dan khirh tak an nei, dan zawm lo Argentina player zingah an awm.

Match hi a tir lam khelh hman a ni a, mahse minute nga vel bak an khel hman lo. Damdawi lam thuneituten inkhel an titawp, he inkhel bikah hian point chhiar telsak ni lo mah se South American ram pahnih hi World Cup khel turin an tling chiang tho.

AFA sawi dan chuan, thil thleng leh inkhelh ṭhat chungchang hi Brazilian Football Confederation leh FIFA te nen sawi ho a ni tawh, chuvangin inkhelh ṭhat leh kher a ngai lo tih a ni.

South America aṭang hian Brazil leh Argentina te bakah Uruguay leh Ecuador ten World Cup hi an khel bawk ang.