Everton-in Chelsea an hnar nawn; Gordon an zuar lo!
Chelsea chuan Everton forward Anthony Gordon lakluh ngei tumin Merseyside club dawr nawn mah se, Everton chuan an dawrna hi an lo hnar a, Gordon chu zawrh lai a nih loh thu an lo hrilh!
London club Chelsea hian kar tir lam khan pound maktaduai 40 ngawtin Everton hi an lo dawr tawh a, mahse, Toffees (Everton sawina) hian an player beiseiawm hi chhuahtir an tum lo tih an lo lantir tawh.
Chelsea an beidawng duh lo a, £45mtd-in Everton an dawr nawn a, mahse, a chhanna chu a ngai bawk a ni - Frank Lampard-a enkawl team hian an player ṭhangduang tak hi hralh an phal lo.
Nipui transfer bazar-ah Chelsea an la bazar zo lo a, Gordon bakah hian Leicester City defender Wesley Fofana an rim mek bawk a, hetihrual hian Emerson Palmieri erawh West Ham lamah an chhuahtir a rinawm thung.
Hello Gordon
Lampard-a'n Gordon chhuahtir a duh lo a, Everton-ah hmun pawimawh chantir zel a duh - April thlaa Merseyside derby-ah phei chuan a player hi a chhan lutuk a, FA-in £30,000 chawi turin English midfielder ropui ṭhin hi an hrem phah hial.
Mahse, Chelsea an lo lang a, Premier League-a match 51 chiah la khel forward hi pound maktaduai 45 thlengin an ngam - mi tam tak ngaihdanah chuan Everton tan hian hralh mai tawh awm tak a ni a, mahse, Merseyside club hi an duhah an chiang.
September 2020-a kum nga cham tura contract thar ziaktu hi chhuahtir an tum lo. Chutihrual chuan an chelh reng thei ang em, tih chu zawhna awm mek a ni a, Chelsea hian a vawi thum nan dawr nawn an tum dawn niin an sawi!
Gordon hian league match 51-ah goal li chiah a la khung a, assist vawi thum a nei tel - mahse, Chelsea hian an dawr nawn dawn a nih chuan £50mtd velin an dawr nawn ngei a rinawm a, Everton tan ṭan reng a har mai thei.
Duhlai Fofana
Chelsea-in an duh si, lak theih loh pakhat an la nei a, a hming chu Wesley Fofana a ni. Leicester City centre back hi London club hian £60mtd bawr vela lakluh tumin an dawr a, Foxes chuan an la hnar rih.
Kum 21 mi Fofana hian Chelsea-a khelh a duh a, Leicester thuneitute lamah Stamford Bridge pantir turin a ngen tawh nia sawi a awm - mahse, Leicester hian £85mtd aia tlawma hralh an tum lo a, khawvela defender man to ber nih tir an duh.
Foxes hian thil pakhat chiang takin an hria - Chelsea hian Brighton & Hove Albion full back Marc Cucurella chu £63mtd-in an lei a, Spanish defender hi Manchester City-in £40mtd-a an lei ngam loh a ni.
Sum lama talbuai mek Leicester hian an defender chhuanvawr an chân dawn a nih chuan man man taka chhuahtir an duh a, hei vang hian an phut ang zata Chelsea-in an lei ngam lo a nih chuan chhuahtir loh mai pawh an duh zawk.
Sumdawn thiam
Foxes hi club sumdawn thiam tak pakhat an ni tih hriat a ṭha a, chumi tichiangtu pakhat chu pound maktaduai 80-a Manchester United lama Harry Maguire an kaltir thei kha a ni.
Leicester-in player langsar an lo hralh tawh thlir ila, Maguire bakah N’Golo Kante, Danny Drinkwater, Riyad Mahrez leh club academy graduate Ben Chilwell te an ni a, anni panga nei tur hian £25mtd aia tlem an seng.
Mahse, player panga hi £250mtd vel zetin an hralh a, £110mtd ngawt chu player panga hralhna aṭangin an hlep thei - namai lo tak a ni! October, 2020-a French club Saint-Etienne aṭanga £35mtd senga an lakluh Fofana man an chhiar to pawh hi a awm lo hran lo.
Thuthangah chuan Chelsea hian Fofana hi pound maktaduai 80 chuanga lei hi an hreh lo, tih a ni a, enge thleng zel dawn a la hriat loh - kum 21 mi Fofana hian Leicester tan match 52 khel tawhin goal khat a khung a, assist vawi khat a nei bawk.
Hammers-ah Emerson?
Chelsea-in player lakluh tum lamah thawm lian tak an nei a, hetihlai hian full back Emerson Palmieri chuan West Ham pan turin inbiakna a neihpui mek - he thuziak i chhiar meuh chuan an inlalut fel tawh hial mai thei.
Hammers hi an player lakluh thar, defender Nayef Aguerd a inhliam mek a, tawnhriat nei ṭha Craig Dawson leh Angelo Ogbonna an inhliam bawk avangin defender thar mamawhna a na a, Emerson Palmieri lam an hawi.
Kum 28 mi Emerson hian season hmasa kha Ligue 1 club Lyon-ah loan-in a khel a, match 36-ah goal khat khungin assist vawi hnih a nei. Kum 2017 khan Chelsea hi AS Roma aṭangin a zawm a, match 71 khelhsak tawhin goal hnih a khung a, assist vawi nga a nei.
Chelsea hian Cucurella an neih tawh avangin Emerson tan hmun chan tam a beiseiawm lo a, West Ham lam a awn hi a awm lo hran lo. Hammers hian Paris St-Germain defender Thilo Kehrer an dawr mek bawk a, Germany international hi kum 25 mi a ni.