Monreal-a'n inkhelh a chawlhsan

Arsenal defender hlui Nacho Monreal chuan football a chawlhsan thu a puang, a chawlh chhan hi hun rei tak chhung khup hliam vanga a buai tawh vang a ni a, a duh aia hmain a chawlh a ngai tihna a ni.

FA Cup vawi thum champion tawh Monreal hian June thla khan Spanish club Real Sociedad a chhuahsan, season hmasa kha a khup hliam vang hian a inkhel thei lo - nikum September thlaa an zai hnuah ngai a awh leh thei lo.

Kum 36 mi Monreal chuan, "Ka inkhel chhunzawm thei tawh lo. Kum 36 mi ka ni tawh a, season 16 chhung professional football ka khel. Ka taksa in a tlin tawk chu a thleng tawh a ni, duhtawk chin nei lo mah ila ka chawlh a ṭul.

"Football zinkawng a tawp a, hringnun thar pakhat chu a inṭan leh ang. Hun nuam leh hlimawm tam tak ka tawng tawh a, ka hma hunah pawh chutiang thil chu a thlen chhunzawm theih ngei ka beisei," tiin a sawi.

Osasuna tan pawha khel tawh Monreal hian 2013 January thla khan Arsenal a zawm, kha mi ṭum thlasik bazara Arsene Wenger-a'n a player lakluh awmchhun niin - Malaga ṭangin pound makatduai 10 bawrin a la.

Gunners tan match 250 a khel a, goal 10 a khungsak. North London club tan hian 2014, 2015 leh 2017 te khan FA Cup nomawi a chawi pui a, 2019 Europa League final khel mah se Chelsea lakah an vanduai.