Wolves-in Nunes an lalut dawn

Wolverhampton Wanderers chuan an club player man to ber ni turin Sporting Lisbon midfielder Matheus Nunes an lalut dawn a, Portuguese club nen hian pound maktaduai 38-in inremna an nei a ni.

European club lian tam tak chil tiputtu Nunes hian mimal thilah English club hi inremna a la neihpui lo a, hei erawh fel thuai tura beisei a ni - he thuziak i chhiar meuh chuan an inrem tawh hial ang.

Nunes hian Portuguese club tenau Ericeirense aṭanga a career ṭanin, kum 2018 khan Portuguese second division club Estoril a zawm a, season khat a khelh hnuah kum 2019 khan Sporting Lisbon a zawm.

Sporting Lisbon tan hian match 101 khelin goal riat a khung tawh a, assist vawi kua a nei bawk. Primeira Liga (1), Taca da Liga (2) leh Supertaça Cândido de Oliveira (1) nomawi a chawi tawh a, season hman zawh takah khan Primeira Liga Team of the Year-ah a lang hial.

Kum 23 mi Nunes hian tun season-ah match hnih khel tawhin goal khat leh assist vawi khat a nei a, £38mtd-a Wolves hi a zawm a nih chuan, kum 2020-a £35.6mtd-a Wolves-in Porto aṭanga Fabio Silva an leina man kha a khum dawn tihna a ni.

Wolves hian Premier League-a an kir hnuah, a zawnin pasarihna dinhmun an luah a, Premier League 2020-21season-ah khan 13-na an ni a, season hmasa chawhma lamah khan che ṭha viau mah se season tawp lama an match sarihah an chak zo lo vek a, table-a 10-na ni chungin season an khar.

Hetiang boruak karah hian, Wolves hian an player pawimawh pahnih o Conor Coady leh Roman Saissan chhuahtir bawk a, fans lam aṭangin sawiselna a nasa hle.

Mahse, tun hnaiah transfer-ah che chhoin, £20.5mtd man Burnley defender Nathan Collins leh £27.5mtd man, Portugal forward Goncalo Guedes an lalut a, Nunes an lalut leh dawn ta bawk.

Wolves hian tun season-a an league match hmasa berah Leeds United chu 2-1 in an ngam lo a, Aleksandar Mitrovic penalty hlah zarah Fulham chu goal khung loin an inhnehtawkpui bawk.