Thu dik an hre thuai ang - Ronaldo

Manchester United forward Cristiano Ronaldo chuan tun aṭanga rei vak loah a hma hun tur a sawi chiang dawn, nimin khan instagram lamah a hma hun a sawi chian tur thu hi a tarlang a ni.

Ronaldo hian Old Trafford chhuahsan a duh, mahse club lamin chhuahtir an remti lo. Champions League khelh a duh a, eng club ber nge a zawm dawn tih erawh sawi a la ni lo bawk - hma hun chiang lo takin a awm mek.

Man United defender hlui Gary Neville chuan, "Ka ngaihdan chuan Cristiano Ronaldo hi khawvela player ropui ber a ni, hetianga nghak reng lo hian Manchester United fan-te hi thu dik hrilh se ka duh.

"Club hian harsatna a tawk mek a, hetih lai hian hruaitu a mamawh. Rilru chiri taka fans an awm lai hian ani chauh hi transfer boruak chingfel thei a ni," tiin a sawi a, a hma hun ti chiang rang turin a duh a ni.

Instagram lamah Ronaldo chuan, "Tun aṭanga chawlhkar rei loteah thudik an hria ang," tiin a sawi a, media lamain dawt hmanga an beih thu leh, chanchin thar 100 a lakkhawm zinga panga chiah thu dik a hmuh thu a sawi bawk.

Ronaldo hian Man United tan season khat daih contract a la nei, kum 37 mi a nih tawh avangin inkhelhna hun a ngah tawh lo. Chuvangin a theih hram chuan Champions League khelh a duh niin a lang.