Man United-in Pulisic an beisei

Manchester United chuan an hmelma Chelsea hnen aṭangin United States captain Christian Pulisic chu loan hmanga lakchhuah an beisei. Kum 23 mi Pulisic hi Thomas Tuchel hnuaiah inkhel bul a ṭan meuh lo a, kum tawpah FIFA World Cup khelh a nih dawn avangin khelhna tamna a mamawh.

Erik ten Hag-a hote hian season bul an ṭan ṭha lo a, nipui bazarah pawh an che ṭha chuang lo. English club hian Adrien Rabiot chu Juventus aṭanga lakluh an tum a, a man chungchanga club pahnih hi inrem vek tawh mah se hlawh chungchangah an inrem thei lo. Kum 27 mi Rabiot hian hlawh a phut zat leh United pek phal zat a inthlauh deuh avangin inremna a awm theih a rinawm loh.

United hian Rabiot hi Bruno Fernandes leh Christian Eriksen te nen hlawh inang khat pek an duh laiin French midfielder agent leh a nu ni bawk Veronique chuan a aia sang phut.

Man United hian nipui transfer ṭantirh aṭanga an beisei tawh Frenkie de Jong an la beisei reng a, Real Madrid midfielder Casemiro bakah Brighton midfielder Moises Caicedo te hming sawi ring an ni bawk.