Manchester City zawmtu Kyle Walker

Manchester City chuan Premier League lama an elpui Tottenham aṭangin Kyle Walker an lalut. England international defender hian kum nga daih contract a ziak a, pound makataduai 45 man niin maktaduai 50 thlenga pung chho thei tur a ni. City hian an inremna anga pound maktaduai 50 an pe tling a nih chuan British player manto ber a ni ang.

Kum 27 mi Walker hian kum 2009 khan Sheffield United aṭangin Tottenham a zawm a, Spurs tan hian league match 183 khel tawhin manager Mauricio Pochettino kaihhruaina hnuaiah season hmasa bik khan match 31 inkhel bul ṭanin Premier League team of the year zingah thlan a ni hial.

City manager Pep Guardiola-a'n season hmasa tawp rualin Pablo Zabaleta leh Bacary Sagna te a chhuah zalen a, free transfer-a lakluh a tum Dani Alves-a'n Paris St-Germain a zawm takah chuan manto takin Walker a lalut ta a ni.

Man City defender thar Walker chuan, "Pep Guardiola hi khawvela manager ṭha leh zah hlawh berte zinga mi a ni a, a kaihhruaina hnuaiah hmasawn theih ngei ka inbeisei," tiin a sawi.

City hian Walker an lakluh bakah Barzil club Vasco Da Gama aṭangin kum 19 mi Brazilian U20 international midfielder Douglas Luiz chu kum nga chhung atan an lalut dawn tih a chiang tawh bawk.