Vawiinah Lammualah Mizoram Police Vs I League champion
Lalbiakliana Memorial MFA Super Cup-ah I League champion Aizawl FC-in inpuahchahna nei ṭha Mizoram Police an hmachhawn dawn a, tukin dar 10;00-a Lammual inkhel hi a hmuhnawm ang.
Vawiin hian MFA Super Cup last 16 chu khelh zawh a ni dawn a, MPL club pahnih Chanmari West FC leh Dinthar FC hmalam hun a hriat bawk dawn a ni.
AFC-ah Kareem
Aizawl FC-in an match hmasa berah MPL champion Chanmari FC an hneh a, FC Khatla (11-0) sawp zui. Heti chung hiaan tualchhung player nei ṭha Mizoram Police hmaa chak tura 'rinkai' an ni phak bik lo!
Amaherawhchu, I League club-in Kareem Omolaja Nurain an lalut a, Nigerian defender hi a inlan nghal dawn avangin AFC hi dah hniam theih an ni tawh lo.
I League club assistant coach Lalruatdika chuan, "Kan defender-te an inhliam nasa a, hei vang hian Kareem hi a luh nghal ngei a rinawm. Kan bulah vawi khat chiah training a la nei a, eng ang chiaha ṭha nge tih ka la sawi ngam lo," tiin Vanglaini a hrilh.
Kareem hian India ramah tawnhriat a nei ṭha tawh a, kum 2009 khan J&K Bank FC tan khel ṭanin India ram club lar JCT Mills Phagwara, Royal Wahingdoh FC, Southern Samity FC, Lonestar Kashmir FC leh Mohammedan SC tan a khel tawh.
Season liam ta khan Kareem hian Minerva Punjab-ah AFC player hlui Joel Sunday a thlak a, Mizo club an mikhual ṭumin freekick aṭangin nalh zetin an si phurh a sut. Nigerian player feet 5 leh inches 10-a sang hi midfield-ah pawh chhawr theih a ni.
Inkhel tur chu
Aizawl FC tan match hmasa bera sawisel hlawh Lalruatfela Zote-in match hnihnaah goal li a khung a, MPL5 best midfielder hi hliam vanga I League-a a inlan theih loh hnuah ngai a awh chho mek.
East Bengal aṭanga Aizawl FC-a rawn let David Lalrinmuana'n training-naah theihtawp a chhuah a, hmun pawimawh a chang chho leh ang, I League champion hian Kareem bakah hian captain Alfred Kemah Jaryan an nei a, foreigner pahnih an neih hi an danglamna tur a ni.
Mizoram Police-in Lengpui (10-0) leh Kolasib Ṭumpui GSA (9-0) lakah goal 19 an khung a, goal an chhuah lo. Police tan tlar hma player Lalfakzuala (Goal 6), Lalbiakhlua (5), Lalsangbera (1) leh F. Lalrinpuia (1) te chu an innghahna a ni dawn. Midfield laia inkawp V. Laltanpuia leh Lalramtharmawia te an pawimawh ang.
Tlarhnung erawh an khingpui Aizawl FC ang thoin a ṭhat dan ber tur zawngin an la inenchhin a, I League champion lakah fiahna tak tak an hmachhawn dawn a ni.
Inkhel dang
Chanmari West FC-in match hnih an khelh tawhah goal thum an khung a, Lalnunmawia'n goal hnih khung ve vein Jacob Lalrawngbawla'n goal khat ve ve a khung bawk.
Third division kai thar Zauva Memorial FC an hmachhawn hunah Mawitea leh Jacob-a an pawimawh dawn. Electric Veng club hi Mizo striker lâr ṭhin Lalhlimpuia (Tat-a) pa hriat rengna atana din a ni a, pool final an thlen theihna kawngah Tat-a a che pui.
Zauva Memorial FC hian Mission Veng FC leh Hming Hming FC te 2-1 ve vein an hneh a, an goal zawng zawng hi Tat-a khung vek a ni.
Inkhel hnuhnung berah Dinthar FC-in Ramthar Veng FC an hmachhawn dawn a, MPL champion hmasa ber hian season liam taa an Nigerian midfielder Clarence Carter Ezebube an chah thleng leh tawh a, an khingpui tur hi third division club a nih avangin an chhawr nghal erawh a rinawm loh.
Goal 247!
MFA Super Cup-ah match 52 khelh a ni tawh a, goal 247 lut tawhin match tina goal 4.75 lut ang zel a ni.
Venghlui FC forward Vanrammawia Ngente-in goal 8 khung tawhin top scorer a ni a, Chhinga Veng forward pahnih Malsawmfela leh Laldampuia ten goal sarih khungin an dawt.
Seeded awm lohna inelnaah hian team 63 an tel a, MPL club pahnih Chanmari FC leh Ramhlun North ten quarterfinal an thleng pha lo.
FIXTURES - LAMMUAL
POOL FINAL
July 17, Thawhtanni
Group F
10:00 AM Aizawl FC vs Mizoram Police FC
Group G
12:00 PM Zauva Memorial FC vs Chanmari West FC
Group H
02:00 PM Ramthar Veng FC vs Dinthar FC
QUARTERFINAL
July 18, Thawhlehni
11:00 AM Bethlehem VT FC Vs Chhinga Veng FC
01:00 PM Durtlang Leitan FC Vs Venghlui FC
July 19, Nilaini
11:00 AM Aizawl FC Academy Vs Win of Group F
01:00 PM Win of Group G Vs Win of Group H