Vaibelchhe khat hlawh phak zingah Jeje
Indian Super League khelh tur atan sum ngah ISL club ten an Indian player duhzawng pahnih ṭheuh an chelh thei a, tun dinhmuna ISL club nei chiang tawh player zingah vaibelchhe khat hlawh phak player panga an awm - an zinga pakhat chu Mizo tlangval Jeje Lalpekhlua a ni.
Bengaluru FC forward Sunil Chhetri chu tun dinhmuna Indian player hlawh hnem ber a ni a, season khatah vaibelchhe 1 leh nuai 50 a hlawh dawn. Hnahthial tlangval Jeje-a'n a hlawh tur zat hi vaibelchhe 1 leh nuai 30 a ni a, bonus nen chuan kum khatah vaibelchhe 1 leh nuai 40 a hlawh ang - Sunil Chhetri chiah Indian player zingah phak loh a nei.
Chhetri a hausa
India captain Sunil Chhetri-a'n hlawh hnem ber dinhmun a luah tur hi a awm lo hran lo. Bengaluru FC-in ISL an khel dawn tih a chian rualin an player chelh duhah an chiang a, Chhetri leh Udanta Singh (nuai 55) te chu kum thum dang an hnena khelh chhunzawm turin an chelh nghal.
Bangalore-a kum thum a cham chhungin Chhetri-a'n vaibelchhe li leh nuai 60 a hlawh dawn a, chil ti put tham a ni. India tan vawi 94 inlana goal 54 khung thei striker hian a season hmasa berah vaibelchhe 1.5 a hlawh ang a, a season hnuhnung pahnihah chuan vaibelchhe 1.55 a hlawh dawn thung tihna a ni.
Jeje a hla lo
Indian footballer zingah sum vanga hmai uang tur an awm a nih chuan Jeje hi Sunil Chhetri nena dawhkan khat kil ho thei tur an ni. Mizo tlangval hian Chennaiyin FC-ah kum thum cham turin contract a ziak a, kum khata a hlawh tur chu vaibelchhe 1.3 a ni.
Hnahthial tlangval hian a hlawh pangngai piah lamah a khelh ṭhat dan a zirin season khatah nuai 10 a dawn belh ṭhin dawn a, chumi awmzia chu kum thum chhungin vaibelchhe 4 leh nuai 20-in Mizo tlangval hi a hausak belh thei dawn tihna a ni - Jeje hlawh hi Chennai club-in hlawh atana an sen theih zat vaibelchhe 18 aṭanga chhutin 7.78% lai a tling.
Goalkeeper an hlu
ISL-ah starting XI-a ram pawn player khel thei zat chu pangaah tih hniam a ni a, hei hian Indian goalkeeper te hlutna a belhchhah - a hlawkna teltu langsar ber chu Amrinder Singh a ni. Mumbai City FC goalkeeper hian season khatah vaibelchhe 1.2 a hlawh dawn a, Indian goalkeeper awm tawh zinga hlawh hnem ber a ni ang.
Chennaiyin FC-in Jeje ruala an chelh goalkeeper Karanjit Singh chuan kum khatah nuai 70 a hlawh dawn a, a tira vaibelchhe khat chuang hlawh tur anga sawi Debjit Majumder chuan Atletico de Kolkata-ah nuai 60 a hlawh ang. FC Goa si ban nghak tur Laxmikant Kattimani chuan nuai 40 a hlawh dawn a, tawnhriat la nei tam lo Vishal Kaith-te meuh pawhin Pune City-ah nuai 25 an hlawh dawn.
Sum ngah Blasters
ISL-a Indian player hlawh hnem top 5-ah Kerala Blasters-in player pahnih an thawh. Indian defender ṭhangduang tak Sandesh Jhingan chuan kum khatah vaibelchhe 1 leh nuai 20 a hlawh dawn a, tun dinhmunah chuan Indian defender zingah ani aia hlawh hnem an awm lo.
Bengaluru FC-in CK Vineeth chelh theihna dan nei mah se Kerala golden boy hi an chelh lo a, Kerala Blasters lawmah a tla. South Indian club hian season hman zawh taka an player chhuanvawr hi club dang tana khelhtir an tum lo a, kum khata vaibelchhe khat hlawh turin contract an ziahpui.
An khum dawn?
ISL club ten player hlawhah vaibelchhe 18 aia tam an sen a rem dawn lo a, marquee player an lalut a nih erawh chuan an hlawh hi chhiar tel a ni ve lo thung ang. Hemi awmzia chu ISL club ten awmze nei loin players-ah sum uchuak takin an seng thei dawn lo tihna a ni.
Indian player langsar zingah Pritam Kotal, Anas Edathodika leh Robin Singh-te ho chu ISL draft-ah an tel dawn a, sum tam tham tak an la hlawh dawn tih a chiang. Hetihrual hian hlawha insen theih zat bituk avang hian vaibelchhe khat chuang hlawh erawh a harsa tawh dawn a, Sunil Chhetri, Jeje leh Amrinder Singh-te hlawh khumtu chu an awm kher a beiseiawm tawh lo.