Ropuina Ramah Roger Ropuia

Wimbledon champion nomawi pariat, Grand Slam title 19 zet a neih hnuah kum 35 mi Roger Federer-a'n chawlh zai a la rel lo. Swiss star hian Marin Cilic hnehin a vawi riat nan Wimbledon nomawi a chawi a, kum 1877 aṭanga khelh ṭan tennis tournament upa bera champion ngun ber a ni.

Pathianni tlai khan London chhim thlang lamah ni sa lutuk hliah turin chhum a zing a, Wimbledon an khelhna court hrang hrang 17 zinga an ngaihhlut ber Centre Court-a final khelhah Federer hian darkar khat leh minute 41 chhung lekin Cilic chu 6-3, 6-1, 6-4 in a sawp.

Open Era (kum 1968 hnu lam), Grand Slam tournament-a professional player-te an inlan ve theih hnuah Federer hi All England Club-a champion thei upa ber a ni a, Grand Slam vawi 14 champion thei Pete Sampras nen Wimbledon bika record inṭawm an neih (7 titles) chu a rawn khum ta a ni.

Roger Ropuia
Nikum Wimbledon semifinal-ah Federer hi Milos Raonic hneh loin a tla a, a chak loh hnuah, ''He hmunah hian vawi khat chauh tal inkhelh leh theih ka duh ngawt mai," tiin a sawi. Canadian tlangval Raonic a hneh loh hnuah Swiss tlangval hi a khup hliam avangin thla ruk chhung a chawl chhunzawm nghal.

Season thar kan chuangkai a, Junuary thla a khelh Australian Open final-ah Rafael Nadal hnehin nomawi a rawn chawi leh ta mai! A vanglai pawha beisei a phak meuh lohna clay court-ah a inlan lo vek a, a chhan chu a inkhelh thiamna grass court lama hlawhtlin a duh vang a ni.

Wimbledon-ah seeded pathumna ni chungin a inlan a, nikuma a ngam loh Raonic ngei hi quarterfinal-ah straight set-in a hneh let. Nomawi a chawina kawngah hian match sarih khelin set a hloh miah lo. Bjorn Borg (1976) tih lohah chuan set hloh loa Wimbledon nomawi chawi leh thei hmasa ber a ni.

Kum 35 mi Federer chuan, "Kum 30 pelh tawh hnuah chuan Wimbledon final khelh leh ringawt pawh duhthusam a tling tawh a, a vawi riat nana champion phei hi chu beisei phak baka sang a ni tawh. Hetianga hlawhtlinna chang tur chuan player mal chauhin a tih theih a nih lo a, min fuih phurtu an awm ṭhat a ngaih bakah tumruh a ngai bawk," a ti.

Federer hian kum 2003 khan final-ah Mark Philippoussis hnehin Wimbledon nomawi hmasa ber a chawi a, a title hmasa ber a lak aṭanga record siam tur hian kum 14 chhung zet a nghah a ngai. Kum 2012 hnuah kumin hian Grand Slam nomawi a chawi leh chiah, kum li chhung zet chu nomawi lian chawi loin a awm tawh tihna a ni.

A la tawp lo...
Mipa tennis thuneitu sang Association of Tennis Professionals (ATP) hnuaia inelna zingah Grand Slam a hlu ber a, inelna dang aiin lawmman pawh a tamin ranking points pawh a let thawkin a tam zawk. Federer hian Grand Slam nomawi 19 nei tawhin record nei ṭha ber a ni a, kum 35 leh ni 342 zeta upa a ni tawh chungin chawlh a la tum lo.

Fa pali nei tawh Federer chuan, "Tun thlengin ka thlen chin hi ka la sawifiah thiam lo, a hlut zia hi ka sawi thiam loin a ropui ka ti takzet. Nakkumah pawh harsatna dang a awm a nih loh chuan he hmunah hian ka nomawi humhim tura rawn kir leh theih ngei ka inbeisei," tiin a sawi.

World number 3 Federer hian kum 2009 khan a lungdumtu Miroslava Vavrinec chu nupuiah a nei a, Mirka Federer pawh hi tennis khel ṭhin a ni. A nupui hian inelna lian a hmachhawnna hmun apiangah a kalpui ṭhin. Pathianni zan final pawh hi Mirka bakah a fa-te pali chuan a hmunah an en a ni.

Inelna ṭantirh lam khan Federer hian a nupui hian a inkhel lai en peih lo ta se la chuan tennis a chawlhsan nghal thut theih thu fiamthuin a lo sawi tawh, nomawi a chawi hnuah Federer chuan, "Final en turin ka fa-te an rawn kal a, nakinah chuan he lai hmun nawmna leh hlutna hi an la hriat thiam ve ngei ka beisei. Ka team leh kan chhungkaw tan chuan hun duhawm leh hlu bik a ni," a ti.

Thlirna
Mipa tennis huang chhungah chuan Federer hi player hlawhtling ber tih ngam a ni a, Grand Slam nomawi a chawi zat hian a hrilhfiah bawk. Tuna player khel lai zingah a upa ber a, a elpui leh amah hnaih bertu Grand Slam vawi 15 champion tawh Nadal (31 years) aiin major title paliin a la hnem zawk. Nadal bakah Novak Djokovic (30), Andy Murray (30) leh Stan Wawrinka (32) te chu amah aia naupang vek an ni.

Federer hi elpuite aiin upa bik mah se a thiamna a tlahniam lo a, a tha­hruai a zuai deuh tawh nachungin ani aia thahruai ngah zawk a elpuite awmsam taka hneh dan a la hre tlat! A hnungzâng leh khup na vangin buai ve deuh ṭhin mah se 'Tournament zawng zawng ka tan khelh a rem tawh lo' tih thu sawitu a nihna a takin a lantir a, inelna hmachhawn tur a thlang thiam bawk.

Player naupang leh theihna nei sang tak tak rawn chhuak zel mah se Federer hian a thiamna a theihnghilh thut dawn bik lo a, hliam nei loa a inkhel thei zel a nih chuan nomawi lian tham a la chawi leh thei ngeiin a rinawm.