Vawiinah Lammualah inkhel hmuhnawm BVT lakah Chhinga Veng fiahna
Lalbiakliana Memorial MFA Super Cup quarterfinal chu vawiin aṭangin Lammualah khelh ṭan a ni dawn. Dar 11:00 hian champion rinkai Chhinga Veng leh Bethlehem Vengthlang te an inkhel ang.
Chhinga Veng hian quarterfinal lut turin goal 37 teh meuh an khung a, an ṭhat vanga khung tam nge khingpui nem vanga khung tam tih vawiinah a hriat ang.
Chawhnu dar 1:30-ah Durtlang Leitan FC leh Venghlui FC te an inkhel bawk ang.
Quarter final-a a chak zawkin Rs 20,000 an hlawh phak tawh ang a, a chak loin Rs 8,000 an hawpui ang.
A ṭha thlan khawm
Chhinga Vengin season liam ta khan MPL an khel ṭan a, an au hla chu 'Chhinga Veng - nuam, nuam, nuam' tih a ni a, result an neih ṭhat loh avangin Lammual nuam an ti ngai meuh lo.
Tun season-ah erawh nomawi chawi ngei tumin player ṭha an khawn khawm a. Mizo striker ṭha pali Malsawmfela, MS Dawngliana, Lalrammuanpuia leh Lalkhawpuimawia te an kawl vek. Wing-ah lah Laldingngheta leh MPL5 top scorer Laldampuia te an nei bawk. An harsatna ṭhin keeper-ah Aizawl FC aṭangin Zothanmawia (T. Mawia) an lak avangin harsatna an nei tawh lo.
BVT coach Chawngthansanga chuan, "Chhinga Veng chu training pawh nei mumal lo mah se an player-te hi chakpui tham a ni," tiin a club hlui chu ṭha a ti hle.
Chhingcows coach Lalsangzuala Hmar tana harsatna ber tur nia lang chu starting eleven thlan a ni. Santosh Trophy-a Mizoram coach chuan, "Harsatna tur a awmin ka hre lo, player thlan hi ka hna zinga pakhat a ni. Lungawi lo an awm a, ka thu an zawm lo a nih chuan an chhuah mai a ṭul dawn a ni," tiin Vanglaini zawhna a chhang a, team boruak a ṭhat thu a sawi tel bawk.
BVT beiseina
Bethlehem Vengthlang FC pawhin player an nei ṭha. Chhingcows hneh thei tur squad an neih avangin vawiin inkhel turah hian chak tura rinkai zawk awm mah se chak chiang an awm lo. Coach Chawnga'n position tinah MPL-a tawnhriat nei ṭha player chhawr theih tur a nei a, team khawng tak an ni.
BVT hian Durtlang FC 10-0 in an sawp a, AFC Academy U18 leh FC Venghnuai an hneh ṭumah erawh hnehna chang turin vanneihna an mamawh.
Chawnga buaina ber chu tlarhnung a ni. Defender chak ṭha Laldinpuia chu inhliam vangin chhawr theih a la ni dawn lo a, hei vang hian Zawlnuam tlangval MS Dawngzela'n (Notea) ṭha zawka a khelh a ṭul dawn a, AIFF Academy chhuak Joseph Lalsanglura leh K. Lalmalsawma ten game puitling zawk an lantir a ṭul bawk ang.
BVT boss Chawnga chuan, "Kan theihna zawng zawnga kan khelh chuan eng team mah hneh theih loh tur an awm lo. Chak tumin Lammual kan pan ang," tiin semifinal thlen a tum.
Chak tur chuan goal nawr kawngah captain Lalrammawia, Ramengmawia leh R. Lalrammawia te an pawimawh dawn a, Zo United aṭanga an lakluh K. Lalnunzama chu midfield-ah a thawhrim lehzual a ṭul bawk ang.
A harsa dawn
Chhinga Veng-in hi fiahna tak tak an hmachhawn hmasak berna tur a ni a, quarterfinal kalkawngah goal 37 teh meuh khungin goal hnih chiah chhuah mah se an lama goal lut vang hian match hnuhnung berah an talbuai hman!
Chhingcows lakah Chawnpui FC-in 2-1 in hma an hruai a, hun tawpah 14-2 ni mah se first division club hi player 10-in hun rei tak an khel tluan tih hriat a ṭha a, Sanga hote hi talbuai thei chauh ni loin chak lo thei an ni tih pholanin a awm.
Coach thawkrim Sanga chuan, "BVT hian player an nei ṭha a, hetiang team hneh tur chuan kan theihna zawng zawng a kan khelh a ṭul ang. MPL club lakah chuan chetsual a thiang lo a, fimkhur taka kan khelh a ṭul a ni," tiin a sawi.
Goal khung thei
Chhinga Veng tlarhmaa awm Sawmfela leh Dampuia'n goal sarih ve ve an khung tawh a, Dawngtea'n goal nga a khung tawh bawk. Venghlui FC striker Vanrammawia Ngente-in match thum aṭang thoin goal riat a khung a; goal khung tam ber erawh goal 9 khungtu Chanmari West forward Lalnunmawia a ni a, top scorer tur pawh a la chiang lo hle.
Goal riat khung tawh VR-a khelhna Venghlui hian Zemabawk North FC (5-0), Piler FC (4-2) leh Ramhlun FC (5-0) an sawp thei. Aan khingpui tur Durtlang Leitan erawh Phoibi FC (10-2) an sawp hnuah Lungverh FC leh Sailam FC te 2-1 ve vein an hneh hram. First division club Venghlui FC hi third division club Leitan lakah chungnung zawk tura ngaih an ni.
Quarter final aṭang hian Zonet TV chuan live-in an pe chhuak tawh dawn a ni.
Quarterfinal - Fixtures
July 18, Thawhlehni
11:00 AM Bethlehem VT FC Vs Chhinga Veng FC
01:30 PM Durtlang Leitan FC Vs Venghlui FC
July 19, Nilaini
11:00 AM Aizawl FC Academy Vs Mizoram Police
01:30 PM Chanmari West FC Vs Dinthar FC