Lucas Leiva-a'n Lazio a pan

Liverpool midfielder Lucas Leiva chuan nimin khan Rome khawpui a thleng a, pound mak­taduai ngaa Lazio zawm turin medical a nei nghal. He thuziak i chhiar meuh chuan Brazilian mid­fielder hi Italian club pla­yer a ni tawh hial mai thei.

Kum 30-a upa mid­fielder hi nakkum nipui transfer-ah a contract neihlai a tawp tawh dawn a, manager Jurgen Klopp-a hnuaiah hmun pawimawh a chan phak bawk si loh avangin Reds hian Lazio nena inbiak phalna hi an pe a ni.

Lucas hian kum 2007 khan Brazilian club Gremio aṭangin Liverpool hi pound maktaduai ngain a zawm a, inelna hrang hrangah match 346 inlan tawhin league-ah match 247 ngawt a inlan sak.

Mahse, Klopp-a'n Liver­pool a enkawl hnu­ah hmun a chang phak meuh lo a, Brendan Rod­gers hnuaia defensive midfielder hi German coach hian a hman ve chhunah pawh defense-ah a chhawr tlangpui. Season hman zawh takah khan inelna hrang hrangah match 31 chiah a inlan a ni.

Hetihlai hian Liver­pool-in nipui transfer-ah Mohamed Salah leh Dominic Solanke chiah an la lalut a, RB Leipzig midfielder Naby Keita an beisei mek bawk.

Reds manager Jurgen Klopp chuan, "Kan car lei duh ang tak kha kan dawr tum ten lei an phal loh chuan a buaithlak a, annin car dang min kawhhmuh a, keinin kan dawr ngat ngat thung a ni," tiin an player duhte lakluh ngei tuma an dawr mek thu tehkhin thu hmangin a sawi.