Police-in I League champion hneh
Inpuahchahna nei ṭha Mizoram Police-in I League leh MFA Super Cup champion lai Aizawl FC 4-3 in an hneh. Quarterfinal-ah MPL club Ramhlun North FC hnehtu Aizawl FC Academy an hmachhawn ang.
Lalbiakliana Memorial MFA Super Cup last 16 khelh zawh a ni a, nimina inkhel dangah Mizoram Premier League club Chanmari West FC leh Dinthar FC ten hnehna an chang a, naktuk tlaiah Aizawl West club pahnih hi semifinal luh inchuhin an inhmachhawn ang.
A thiam pariat zingah MPL club panga - Police, West Warrior, Dinthar, Bethlehem Vengthlang leh Chhinga Veng te an tel a, season liam ta finalist Aizawl FC leh Chanmari FC bakah Ramhlun North FC te tan hmun a awm tawh lo thung.
I League club
India rama inelna sang ber khelpha Aizawl FC-in foreigner pahnih captain Alfred Kemah Jaryan leh Kareem Omolaja te chu Police hmachhawn turin an luhtir nghal a, fitness la nei ṭha tawk lo David Lalrinmuana erawh bench-ah dah a ni thung.
AFC-in bul an ṭan ṭha zawk a, rawlthar duhawm Rochharzela'n halfway line pelh hret aṭangin la tlang mah se Police keeper Lalṭanpuia'n ṭha takin a dang. Khaw lum hnuaiah fitness ṭha zawk Police danglamna a lang chho a, Lalbiakhlua'n goal ruakah goal ban a pet per avangin I League club-in insiamṭhatna hun an neih phah.
First half injury time-ah captain Alfred leh Lalruatfela Zote te thawhrah sengin H. Lalbiakthanga'n AFC hmahruaina goal a khung a, second half ṭan aṭanga minute thumna lekah Rochhara'n a khung leh bawk avangin Police hmabak a ko hle.
Police nge nge
Mizoram Police-in ṭawiawmtu an nei ṭha a, AFC aia ṭantu an neih ṭhat avangin an tlawm duh lo.
MPL3-a Aizawl FC champion puitu Police striker F. Lalrinpuia'n minute 58-naah Liberian midfielder Alfred tlan pelin a cross ball ṭha tak chu Lalsangbera'n nalh zetin a khung a, minute khat hnuah Lalfakzuala'n AFC keeper Lalawmpuia tlan chhuah nachang hriat loh zarah an si phurh a sut.
AFC an talbuai a, defender thar Kareem-a che thei lo a, inhliam vanga an tlarhnung phuahchawp chu midfield lamin an puih ṭhat loh bawk avangin a pawp lehzual. Minute 68-naah Biaktea through ball fing chu AFC offside trap bumtu Valpuia'n um lutin keeper AwP-a bumin goal thumna a khung.
Police-in goal tam zawk khung thei an ni a, an fimkhur tawk loh avangin goal dang an khung belh lawk lo. Injury time-ah Sangbera hmangin goal lina an khung hram a, Police defender MC Lalthanzauva'n an lamah tilut zui mah se hun a tam tawh loh avangin Aizawl FC tan thawhchhuah ngaihna a awm tawh lo.
5 Star Mawitea
Third division kai thar Zauva Memorial FC tan MPL club Chanmari West FC an lian lutuk a, an thiampuipa Lalhlimpuia (Tat-a) a awm loh bawk avangin goal 15 an chhuah ṭumin goal an khung ve lo.
West Warrior tan captain Lalnunmawia'n goal nga a khung a, goal kua khung tawhin top scorer a ni mek. Chanmari West goal 15 zinga goal 14 hi Ramhlun South tlangvalte khung a niin C. Lalremruata leh R. Lathanmawia ten hattrick an siam ve ve a, Vanlalthlamuana leh Lalromawia ten goal khat ve ve an khung bawk.
Goal khat khungtu Chanmari West tlangval JH Lallawmkima chu Ramhlun South-a khawsa lo zinga goal khung ve awm chhun a ni.
Goal chhuah lo Dinthar
MPL champion hmasa ber Dinthar FC chuan quarterfinal lut turin third division club Ramthar Veng FC chu 3-0 in an hneh a, match thum an khelh tawhah goal an la chhuah lo.
Maimawms tan hian Republic Veng rawlthar duhawm Lalmalsawmtluanga'n a club thar tana starting eleven a chan hmasak berah goal a khung nghal a, second half-ah Armed Veng South tlangval Lalnunsanga leh Sihphir tlangval Lalramliana'n an khung belh leh bawk.
Nimin Inkhel Results
Group F
Aizawl FC 3 - 4 Mizoram Police FC
AFC : H. Lalbiakthanga 45+1'; Rochharzela 48';
MC Lalthanzauva 90+3' (OG)
MPFC : Lalsangbera 58', 90+1'; Lalfakzuala 59'; F Lalrinpuia 68'
Group G
Zauva Memorial FC 0 - 15 Chanmari West FC
CWFC : Vanlalthlamuana 9'; Lalnunmawia 39', 40', 50', 77', 80'; Lalromawia 42'; JH Lallawmkima 55', 66'; C. Lalremruata 60', 72', 85'; R Lathanmawia 71', 73', 75'
Group H
Ramthar Veng FC 0 - 3 Dinthar FC
DFC : Lalmalsawmtluanga 34'; Lalnunsanga 71'; Lalramliana 90'