Lunglawm a kim - Garbine Muguruza

Wimbledon hmeiche singles champion Garbine Muguruza chuan tennis player tan chuan Grand Slam chawi aia hlu dang a awm loh thu a sawi chhuak a, world ranking chu a ngaih pawimawh ber a nih loh thu a sawi tel bawk.

Spain nula zinga Wimbledon champion ni thei pahnihna Muguruza hian Inrinni zan khan a naupan lai aṭanga a inkhel a en ṭhin Venus Williams chu straight set-in a hneh.

Kum 23 mi Muguruza chuan, "Player tinin beisei leh duhthusam kan nei vek a, ka tan chuan Grand Slam champion nih aia hlu a awm thei tawh chuang lo. French Open nomawi ka chawi hnuah inelna hrang hrang hmachhawn zui mah ila ka hlawhtling chhunzawm thei lo a, final ka luh lehna hmasa bera ka champion leh thei mai hi a hlu bik a ni," tiin a sawi.

Major title pahnih nei tawh Muguruza hi world ranking chhuak thar berah chuan number 15 aṭangin panganaah a kaisang a, pakhatna dinhmun luahtu Angelique Kerber-i'n final a thlen zawh loh avangin number 3 aṭangin Karolina Pliskova chu a chung berah hlankai a ni.

Ranking chungchang sawiin Muguruza chuan, "Ranking hi chu kan inkhelh­na hrang hrang belh­khawm aṭanga teh a ni a, ka tan chuan world number 1 nih aiin in­khelh apianga ṭha taka khelh theih a pawimawh zawk. Ranking-a number 1 nih rei zawng ai chuan no­mawi chawi hnem ka ngai pawimawh," tiin a sawi.