Tute nge ISL club coach?
November-ah Indian Super League (ISL) khelh ṭan a ni dawn a, July 15 kha club inlan tur ten coach hming an tihchian vek hun atan ruat a ni. ISL club 10-ten season thara an coach tur an puang kim ta ngei a, rin lawk ang ngeiin hming langsar tak tak an awm nual.
ISL-a kan hmuh tawh coach zingah Antonio Habas, Steve Coppell leh Alexandre Guimaraes-te an inlan leh dawn a, coach dang pasarih erawh Indian football-a mithar vek an ni dawn. Pune City coach Habas leh Mumbai City coach Guimaraes-ten season hmasaa an club an enkawl chhunzawm dawn a, ISL-ah Coppell la cham chhunzawm dawn mah se Kerala Blasters hawisanin Tata Steel club a enkawl dawn thung.
Teddy Sheringham (ATK)
Football ngainatu inti zingah 'tu nge Sheringham?' tia inzawh nawn a ngai lo. Tottenham Hotspurs leh Manchester United striker hlui hian Atletico de Kolkata a enkawl dawn a, ISL season thum awm tawha vawi hnih champion thei club hian a lakah beiseina an nei sang ang - a thawhpui turin Indian football hrechiangtu Bengaluru FC coach hlui Ashley Westwood chu technical director-ah an ruat bawk.
Albert Roca (Bengaluru)
Barcelona assistant manager hlui Roca-a'n season hmasaah beiseina sang tak nen Bengaluru FC a pan a, AFC Cup final lutin Federation Cup nomawi chawi mah se I League-ah beisei an phak loh miau avangin 'season ṭha' tia chhiar sak a harsa. Galatasaray-ah pawh assistant lo ni tawh hian tun season-ah a theihna tak tak pholan a tum ang.
John Gregory (Chennaiyin FC)
England international hlui, a vanglaia Northampton Town, Queens Park Rangers leh Derby County tana khel thei midfielder hian inkhelh a chawlhsan hnuah pawh Portsmouth, Aston Villa, Derby leh QPR te pawh a enkawl thei a, Premier League meuha tlangnel thei manager hian South Indian club-ah hlawhchham a duh lo tawpin a rinawm.
Miguel Angel Portugal (Delhi Dynamos)
Player a nih laia Real Madrid tana lo khel tawh coach hian inkhelh a chawlhsan hnuah pawh Santiago Bernabeu a bel a, Real C leh B team a enkawl hnuah technical director hna chelhin Racing Santander a enkawl tawh bawk. Italian legend Gianluca Zambrotta hmunruak luah tur a nih avangin a hna hi a awlsam dawn lo.
Sergio Lobera (FC Goa)
FC Goa-in ISL awm hnua a vawi khat nan coach an thlak a, Brazilian legend Zico hmunruak luah turin Sergio Lobera lakluh a ni. Barcelona-a Tito Vilanova hnuaia assistant manager dinhmun lo chelh tawh coach hi Barcelona academy hmingthang La Masia aṭanga coaching zir chho a nih avangin Goan club-in 'tiki-taka' an lantir a nih pawhin a mak lo ang.
Steve Coppell (Tata Steel)
Player i nih laiin Manchester United tan khel la, England tan vawi 42 inlan bawk la, inkhelh i chawlhsan hnuah Crystal Palace, Manchester City leh Reading-ah te coach hna chelh bawk la - football khawvelah chuan 'mikhual' tia koh chi i ni hauh lo ang. Chu chu a ni Steve Coppell chu! English manager hian ISL-a a season hmasa berah Kerala Blasters chu final a hruai thleng thei a, tun season-ah Tata Steel enkawl tur club a zawm.
Rene Meulensteen (Kerala Blasters)
Kerala Blasters-in Coppell chelh lo mah se a thlakna tur an haihchham lo. Manchester United first team coach hlui Meulensteen an lalut. Dutch coach hi Sir Alex Ferguson-a hnungzuitu rinawm a ni a, United-in Premier League (3) leh Champions League (1) an chawina kawngah a thawhhlawk hle. Sir Alex a chawlh hnuah Old Trafford a chhuahsan ve nghal a, Anzhi Makhachkala, Fulham leh Maccabi Haifa-ah coach hna a lo chelh tawh.
Alexandre Guimaraes (Mumbai City)
ISL ngainatu tan Alexandre Guimaraes chanchin inhrilh nawn a ngai lo. Costa Rican manager hian an ram team hi 2002 leh 2006 FIFA World Cup-ah a lo hruai thleng tawh a, UAE club ṭha Al Wasl leh Chinese Super League club Tianjin Teda-ah a theihna a lo pholang tawh. A vawi hnih nan Mumbai club a enkawl dawn a, beiseina a sang ang.
Joao de Deus (NorthEast United)
Higlanders-in Malyasia laka Nelo Vingada an chan hnuah Portuguese coach bawk an lalut a, Sporting Lisbon B team coach hlui Joao de Deus an lalut. Kum 40-a upa manager hian Portuguese league sang ber Primeira Liga-ah Nacional pawh a lo enkawl tawh a, ISL-a semifinal la lut lo ve lo club hian an record duhawm lo thaibo sak turin Portuguese manager hi an beisei dawn a ni.
Antonio Habas (FC Pune City)
Spanish manager hi tun dinhmuna ISL coach zinga Indian football a tawnhriat ngah ber a ni - kum 2014 khan Atletico de Kolkata enkawlin champion nomawi a chawipui a, 2015-ah an nomawi an humhim thei lo thung. Season hmasaah khan Pune City a pan a, beisei ang result neihpui lo mah se tun season-ah pawh Maharashtra club a enkawl chhunzawm dawn - Spanish club Valencia, Granada leh Celta Vigo coach hlui hi Pune beiseina a ni dawn.