Sevilla striker thar Nolito

Manchester City striker Nolito chuan Etihad Stadium a chhuahsan a, Sevilla a pan. Kum 30-a upa striker hian Spanish club tan season thum chhung khel turin contract a ziak a, a man zat puanzar ni lo mah se pound mak­taduai 7.9 bawr vel ni tura ngaih a ni.

Spanish striker Nolito hian season hman zawh tak ṭan dawnah khan City hi Celta Vigo aṭangin a zawm a, a man zat chu pound maktaduai 13.8 a ni. Etihad Stadium-ah season khat a cham chhungin match 30 a khel a, goal ruk a khung sak.

Nolito goal khung paruk zinga goal thum hi City tana a match hma­­sa pathuma a khung a ni a, a beisei angin hmun pawimawh erawh a chang chhun­zawm lo. Kum 2017-ah league match-ah inkhelh bul ṭan a nei lo a, goal a khung miah lo bawk.

City-a kum li cham tura contract ziak striker hian ual au takin City chhuahsan a duh thu hi a lo sawi tawh a, England sik leh sa vangin a fanu hmelhmang pawh a danglam thu hial a lo sawi tawh!

Nolito chuan, "Ka fanu hmel lan dan pawh a danglam vek tawh. English pawh tlem azawng chu ka zir ve a, mah se ka thiam tam lo. He rama khawsak hi harsa ka ti a, chhuah ka duh a ni," tiin a lo sawi tawh a, a duh ang takin a chhuak ta.