An ramah Hamilton a chak ber
Formula 1 driver championship inum boruak a nung chho thar zel. Pathianni tlaia tlan zawh tak British Grand Prix-ah Mercedes driver Lewis Hamilton chu pakhatna a ni a, a teammate Valtteri Bottas chu pahnihna a ni.
Silverstone tlankawngah pole position aṭanga bul ṭantu Hamilton-a'n lap 51 an tlan chhungin harsatna nei loin hnehna a chang a, tun season aṭanga Mercedes car khalhtu Bottas aiin seconds 14 zetin a thleng hma zawk.
Khawtual tlangval Hamilton hian tun season-ah vawi li hnehna a channa a ni a, British GP-ah hian tun hnaiah a zawna vawi li hnehna a channa chiah a ni bawk.
Tun season-a hartharna chang Ferrari driver pahnih ten vanduaina an tawk. Lap thum chauh tlan hmabak an nei tawh tihah Kimi Raikkonen chu a car ke hmalam thlak a ngai a, lap hnih chiah hmabak an neih tawhah Sebastian Vettel-a car ke hma vei lam chu thlak a ngai ve leh bawk.
Driver championship lamah German tlangval Vettel hian point 177 hmuin hmahruaitu a nih chhunzawm a, pahnihna Hamilton laka a hmahruaina erawh a point khat chiah a ni tawh. July 30 tlaiah Hungarian Grand Prix a tlan leh dawn a ni.
Raikkonen hi podium lawn turin pathumnaah a thleng leh thei hram a, hetihlai hian a teammate Vettel erawh Red Bull driver pahnih Max Verstappen leh Daniel Ricciardo te bakah Renault car khalhtu Nico Hulkenberg hnungah awmin pasarihna a ni phak hram.
India team Force India pawh team ṭha zingah an inhlangkai chho ve zel, Esteban Ocon chu pariatna niin a teammate Sergio Perez chu a hnung chiahah a thleng bawk - team championship lamah Force India hian an dinhmun an sawhnghet chho ve zel a ni.
Team championship lamah Mercedes hian point 330 hmuin hmahruaitu an nihna an sawhnghet a, an hnuaiah hian Ferrari (275points), Red Bull (174) leh Force India (95) te an awm. Team ṭha ni ṭhin, tun hnaia beisei phak lo MacLaren-in point hnih bak an la hmu lo a, team 10 inel zingah a mawngphah luahtu an ni.
Eng nge an sawi?
Kum 32 mi Hamilton chuan, "Formula 1 inelna hi khawi hmunah pawh, engtiklai mahin a awlsam ngai lo. Ka teammate Valtteri khan pakuana aṭanga bul-ṭan chungin pahnihna a ni thei, ani khan intlansiak ropui a lantir a, dinhmun derthawngah min dah hman hle a ni," tiin nuamsa taka chak a nih bik loh thu a sawi.
Ferrari driver Kimi Raikkonen chuan, "Tun ṭum atan bik chuan Mercedes kha team ṭha zawk an ni a, an ri reng tihna erawh a ni bik lo. Kan team pawh kan che chhe lo, hun tawp hnaih taka kan car tyre thlak a ngai kha kan vanduai phah a ni. Kha thil kha thleng lo se la chuan result a danglam thei ang," a ti.
British Grand Prix Results
# Driver Team
1 Lewis Hamilton Mercedes
2 Valtteri Bottas Mercedes
3 Kimi Raikkonen Ferrari
4 Max Verstappen Red Bull
5 Daniel Ricciardo Red Bull
6 Nico Hulkenberg Renault
7 Sebastian Vettel Ferrari
8 Esteban Ocon Force India
9 Sergio Perez Force India
10 Felipe Massa Williams
Driver Championship Standings
# Driver Points
1 Sebastian Vettel 177
2 Lewis Hamilton 176
3 Valtteri Bottas 154
4 Daniel Ricciardo 117
5 Kimi Raikkonen 98
6 Max Verstappen 57
7 Sergio Perez 52
8 Esteban Ocon 43
9 Carlos Sainz 29
10 Nico Hulkenberg 26