Khalid Jamil a mangang

Aizawl FC coach hlui, Indian coach awm tawh zinga hlawh hnem ber ni tura East Bengal pan ta Khalid Jamil chuan India rama players ṭha ber ber ten I League a khelh aia Indian Super League pan an thlan zel zawk avangin a mangan ruk thu a sawi chhuak.

Tun hnaiah East Bengal leh Mohun Bagan chuan sum tam tham tak nen Balwant Singh dawr mah se Mariners striker hian ISL draft-a tel a thlang zawk a, season hman zawh taka Kolkata club player langsar zingah - Jeje Lalpekhlua, Prabir Das, Debjit Majumder leh TP Rehenesh te chuan ISL club tan an khel dawn tih a chiang tawh bawk.

I League-a Aizawl FC champion puitu coach chuan, "I League club tan chuan tun hnaia thil thleng hi a lawmawm lo hle. East Bengal leh Mohun Bagan-te hi chu sulhnu ngah leh club lian an ni a, mah se player langsar lalut turin kan buai mek. Player hming langsar kan lalut lo a nih chuan East Bengal leh Mohun Bagan inkhel en tur hian fans an lokal lo mai ang tih a hlauhawm a ni. Vawiin kan hun tawn mek hi chona anga kan pawm­thiam a ngai," tiin a sawi.

East Bengal hian ni­min khan training an ṭan tawh a, tun dinhmunah player 25 ngawt contract an ziahpui tawh. Khalid Jamil hian Aizawl FC aṭangin Lalramchullova, Brandon VL Remdika leh Mahmoud Al Amna-te a chhawm bawk.