Balwant Singh-a'n a rilru a thlak

Mohun Bagan striker Balwant Singh-a'n Mariners tan khelh chhunzawm a thlang niin sawi awm zet mah se Punjab striker hian a rilru a thlak a, season tharah Indian Super League lama khelh a thlang - ISL draft-ah a tel dawn.

India ramah league pahnih I League leh Indian Super League awm ṭhin chu player tan khelh kawp a ni thei tawh lo a, season thar aṭanga chuan league pahnih hi a rualin November aṭanga khelh ṭan a ni dawn a ni.

Balwant hian season hman zawh takah khan I League-ah Mohun Bagan tan a khel a, ISL lamah chuan Chennaiyin FC tan a khel. ISL lam pan a thlan takah chuan July 23-a neih tura ruahman player lilamnaah a inlan ang.

ISL club zingah Tata Steel leh Delhi Dynamos chuan player lilamna hunah player an chhang hmasa ber thei dawn. Tata Steel hi club thar an nih avangin players an la nei lo a, heivanga draft-a player chhang hmasa thei tura tih an ni. Dynamos thung hian ISL club dang angin senior player pahnih chelh thei mah se an players tumah chelh loh an thlang a, hei vang hian draft-ah hian a ṭantir aṭangin players an chhang thei dawn thung a ni.