Hingis leh Murray tan nomawi

Pathianni zan khan Wimbledon mixed doubles final khelh a ni a, seeded pakhatna Jamie Murray leh Martina Hingis te inkawp chuan champion lai Heather Watson leh Henri Konti­nen te chu 6-4, 6-4 a hneh­in nomawi an chawi.

British tlangval leh Swiss nula ṭangdun hian set pahnihah hian game sarihna ve veah an khingpuite service an chhuhsak a, darkar khat leh minute 14 chhungin nuamsa takin hnehna an chang.

Kum 39 mi Hingis hian a vanglaiin hmei­chhe singles nomawi a chawi tawh a, chumi hnuah doubles nomawi pathum leh mixed dou­bles nomawi pahnih a chawi belh leh tawh bawk - Wimbledon title hrang hrang paruk a kawl khawm tawh tihna a ni.

Murray hian Jelena Jankovic nena ṭangdun chungin kum 2007 khan Wimbledon mixed doubles nomawi hi a chawi tawh a, beisei angin a hlawhtling chhunzawm lem lo. Season hmasa khan doubles lamah hartharin Australian leh US Open nomawi a chawi tawh bawk.

Hmeichhe singles world number 1 hlui Hingis chuan, "Kuminah khawtual player zinga pakhat Murray-a'n Wim­bledon nomawi a chawi a, ani nena kan ṭangdun thei hi ka lawm hle. Final thlengin match nga kan khelhah set hloh loin hnehna kan chang thei vek a, tournament kan khelh dun danah sawisel tur a awm lo," tiin a sawi.