Al-Hilal-ah Ali Al-Habsi a lut

Reading goalkeeper Ali Al Habsi chuan Saudi Arabia club ṭha Al Hilal chu season thum chhung khel turin a zawm. Oman international in Saudi Arabia club a zawm thu hi Al Hilal hian anmahni club website lamah an pholang a ni.

Kum 35-a upa goalkeeper hian 2006-ah Bolton Wanderers zawmin Premier League-a a nun bul a ṭan a, kum 2011 thleng khelin Jussi Jaaskelainen thachhang dawltuah a awm ṭhin.

Oman tana match 118 inlan tawh goalkeeper hian 2010 khan Wigan Athletic chu loan-in a zawm a, a khelh ṭhat em avangin 2011-ah a ngheta contract ziahpui a ni. Wigan tan hian 2014-15 season thleng a khel a, 2012-13 ah khan FA Cup nomawi a chawipui hial.

Kum 2015-ah Reading a pan a, Championship club-ah hian player pawimawh niin season hman zawh takah pawh khan match 51 lai a inlan. Mahse, Premier League-a kir leh ngei an tumna erawh playoff-ah a thamral a, Al Habsi pawhin Asia lam pan a thlang ta a ni.