Sir Jim Ratcliffe-a'n Manchester United a lei duh

Manchester United-in tun season-a an Premier League match hmasa pahnihah goal ruk an chhuah a, goal khat chiah an khung - an goal khung ve pawh Brighton & Hove Albion midfielder Alexis Mac Allister-a'n anmahni lama a tih luh a ni.

Red Devils player zingah tun season-a goal khung an la awm miah lo tihna a ni a, coach thar Erik ten Hag hnuaia beiseina sang tak nei United ṭantute beiseina chu match hnih lekah a thamral ṭan mek.

United hian August 22, Thawhṭanni zan dar 12:30-ah league match khel turin Liverpool an mikhual leh dawn a, match thum chhung a zawna hnehna chang lo thei dinhmunah an ding mek - a ropui lo takzet.

Hetiang boruak karah hian United fan-ten club neitu Glazer chhungkua chu an club chhuahsan tura an duhna thu an aupui nasa a, American sumdawng hausate hian share hralh ṭhen an tum nia sawi a awm - hming lo lang hmasa chu Sir Jim Ratcliffe a ni.

Hralh ang
American television network Bloom-berg-in an tarlan danin Glazer chhungkua hian United-a an share hralh ṭhen an duh a, a zawng zawnga hralh erawh an la tum chuang lo - thuneih an la duh tlat.

He thu buatsaih a nih lai hian Glazer chhungkua hi United -a share hralh chungchangah an la inrawn mek a, share hi an hralh ngei ang em, tih chu chiang taka sawi theih a la ni lo.

Chutihrual chuan British mi hausa ber Sir Jim Ratcliffe-a thupuangtu chuan United lei an duh thu a sawi a, "United hi an zuar a nih chuan Jim chu a lei duhtu zinga mi a ni ngei ang," tiin The Times a hrilh.

Ratcliffe-a thupuangtu chuan sawi zawmin, "United hi kan lei thei dawn a nih chuan hun rei tak thlir chunga thutlukna siam kan duh ang," a ti a, United fan ruhkawl Sir Jim Ratcliffe chuan United lei a duh ngei thu a sawi.

United buaina
English top flight league-a vawi 20 zet champion tawh United hian Sir Alex Ferguson-a'n a chhuahsan hnuin ngai an awh leh tawh lo a, an team boruak chuan ṭhat lam aiin zual lam a pan zel zawk.

Red Devils hian Premier League table mawngphah an luah mek a, nipui transfer-ah pound maktaduai 14.7 thlenga a man sang chho thei tur full back Tyrell Malacia, Christian Eriksen (free transfer) leh £57mtd man Lisandro Martinez an lalut tih loh chu player lakluh an nei lo bawk.

United hian rei tak chhung chu Dutch midfielder Frenkie de Jong an rim tawh a, mahse, Barcelona-a khel mek midfielder hian Old Trafford pan tumna a nei lo a, Cristiano Ronaldo a lungawi lo mek bawk - chhuah a duh.

A tawi zawnga sawi chuan Red Devils buaina hi khelmual chhungah chauh a tawp lo a, a inṭanna tak zawk chu khelmual pawn a ni. Fan-ten puh tur an zawng a, tuna an kawh rawn chu club neitu Glazer chhungkua an ni.

Ta se...
United ṭantuten Glazer chhungkua an duh lohna vawi tam an lo lantir tawh a, May 2021 khan Old Trafford-a Liverpool an mikhual tur chu fans lungawi lohna avangin inkhelh hun sawn a ngai hial a, Thawhṭanni zana Reds an mikhual turah pawh United ṭantute hian an lungawi lohna lantir an tum.

Glazer chhungkua hian United fan-ten an duh lo tih an hrechiang tawk tawh a, hei vang hian share hralh ṭhen hi chu an duh ngeiin a rinawm - chutihrual chuan Sir Jim Ratcliffe hming hi langsar viau mah se share tam zawk lei tur a nih loh chuan, United hi a lei duh kher ang em, tih chu zawhna awm thei a ni.

Ratcliffe thupuangtu chuan, "Sum sen tawh emaw, la sen loh lam emaw kan ngaihtuah lo. Jim chuan tuna thil tih theih tur a thlir a, Manchester khawpui tana he club hlutzia pawh a hria a, tun hi inthlak danglam hun a ni," a ti.

Glazer chhungkua hian United-ah 97% vel share an la nei a, an share zawng zawng hi an hralh dawn a nih chuan pound tluklehdingawn nga aia tlawmin an hralh lo ang - Ratcliffe hausakna hi £13.5tld a ni a, Glazer chhungkaw hausakna hi £3.9tld a ni thung.

Duh loh chhan
Glazer chhungkua hian United an lei hnuah hlawhtlinna tam tak an lo chhar tawh a, player lei nan sum tam tak an seng a, coach pawh hlawh tam uchuak tak takin an thlem lut fo - mahse, an duh ber 'result' an nei thei miau lo a, fans huat an hlawh.

Hei chauh a ni lo. Chhungkaw pa ber Malcolm Glazer-a'n kum 2005-a United a lei khan £800mtd zet a seng a, hetihlaia Red Devils lei nana a sum sen tam zawk hi a puk a ni a, United a lei rualin a sum puk hi Manchester khaw club leibaah ziah luh nghal a ni.

Glazer-a'n United a lei laia leiba nei miah lo hi a lei fel hnuah an leiba chu £540mtd a ni nghal a, interest rate chu 7% - 20% a ni nghal. Hetihlai aṭang tawh hian United fan-ten Glazer chhungkua an haw tawh a, mahse, hetihlai hi chuan Sir Alex-a hnuaia an la vul miau avangin thawm a la lian tawk lo.

Mahse, kum kua chhung league nomawi chawi lo leh, kum nga chhunga nomawi chawi nei loa an awm meuh chuan United fans an insum reng thei lo a, Glazer chhungkua hi chhuak turin an duh takzet ta.

Tu nge Ratcliffe?
British sumdawng hausa Sir Jim Ratcliffe hi infiamna lama tui mi a ni a, tunah hian French Ligue 1 club Nice, Swiss club Lausanne-Sport leh Ineos Grenadiers cycling team a nei mek a, a company Ineos chu Formula 1 team Mercedes nen an thawk dun mek bawk - Nice hi nipui transfer-a Arsenal midfielder hlui Aaron Ramsey leh Leicester City keeper Kasper Schmeichel laluttu club-te kha an ni.

Lancashire-a piang, chemical group Ineos-a share ngah ber hian May thla khan Chelsea chu £4.25tld-in lei a lo tum tawh a, mahse, a hlawhchham. Hetihlai hian United lei a tum loh chhan an zawh chuan, "An zuar miau lo alawm," a ti!

Hetihlai hian Ratcliffe hian Manchester United fan a la nih reng thu a sawi a, United fans tam zawk chuan Glazer chhungkua aiin an duh ang tih a chiang - a leina tur sum a nei a, United a ṭan a, buaina erawh Glazer hian an hralh duh kher ang em, tih chu a ni.

March 2022-a an account-a a lan danin United hian leiba £495.7mtd an la nei mek tih hriat a ṭha a, khelmual chhung leh pawn an buaina aṭanga khai chhuak turin sum nei, club hmangaihtu an mamawh.

Ratcliffe beiseina
United-in khelmual chhunga hlawhtlinna an neih loh reng a, an leibain kianzai a rel bawk si loh chuan an hmabak chu tlakchhiat a ni a, he club ropui tak hi an dinhmun a derthawng takzet.

Ratcliffe hian United lei ta se, a tih tur ang engmah la sawi lo mah se Chelsea lei a tum laia a thutiam tam tak kha fan-ten an la hre ngeiin a rinawm a, naupan tet aṭanga a ṭan United tan chuan insen a huam lehzual ang.

Kum 69 mi, mi hausa tawntaw hian Chelsea lei a tum lai khan, sum hlawkna uma Chelsea lei tum an nih loh thu a sawi a, chutiang hlawkna um se an sumdawnna chemical aṭanga sum hmuh tur tam tak a awm thu a sawi.

Chu mai a ni lo - world class player lei te, stadium sak ṭhat, academy tihchangtlunte chu a thupui an ni a, Carrington training ground leh Old Trafford te rei tak chei ṭhat a nih tawh loh avanga lungawi lo United fans tan chuan Ratcliffe lo hi tu nge chhanchhuak tur awm chuang ang le?