Kar li chawl tur Romero

Tottenham Hotspur defender Cristian Romero chu inhliam vangin kar thum aṭanga kar li a chawl dawn. Kum 24 Romero hi Spurs leh Chelsea 2-2 a an inhnehtawk ṭum khan khel tluan mah se a tihrawlah hliam a nei.

Spurs hian August 20, Inrinni zan hian Wolves an hmachhawn dawn a; kai thar Nottingham Forest, West Ham, Fulham leh Manchester City te an hmachhawn chho dawn.

Argentine defender hi league match nga khel lo thei dinhmunah a ding a, hei bakah hian Champions League group match pahnih a la tel thei bawk.

Spurs defender Clement Lenglet chu Southampton nen league match hmasa ber an khelh ṭumin bench aṭangin lut mah se hliam vangin Blues a hmachhawn thei lo. London club-in defender pahnih hliam nei mah se Antonio Conte chhawr theih turin Ben Davies, Eric Dier, Davinson Sanchez leh Japhet Tanganga te an la awm.