A lo kir lehnaah Nadal a chak lo

Rafael Nadal-a'n Wimbledon aṭanga a inhnuhdawh hnuah tournament a khel ve leh chiah a, beisei anga result ṭha erawh a nei lo. Nimin zing khan Nadal hi Borna Coric hneh loin Cincinnati Open-a match hmasa berah a tla.

Kum 36 mi Nadal hi 7-6 (9-7), 4-6, 6-3 in a chak lo. Croatian tlangval Boric hi world number 152-na daih a ni a, atan chuan Nadal hneh hi chanchin chhianchhiah tlak bik a ni ngei ang - atan chuan thil mak a tling.

Spanish player Nadal hi a dul hliam vangin Wimbledon semifinal khelh dawnah a inhnukdawk a, chawlhkar ruk chhung inkhel thei loin a awm. Cincinnati Open-ah hian champion se la chuan world number 1 nih leh theihna kawng pawh a inhawng hial.

Mahse, world number 3 Nadal tan a chung bera awm chungin US Open khelh theih a ni dawn lo. A chungah Daniil Medvedev leh Alexander Zverev te an awm, anni pahnih hi New York khawpuiah pawh a elpui tur an ni ang.

Grand Slam vawi 22 champion tawh Nadal chuan, "New York khawpui kan sawi a nih chuan a danglam daih, a chhan chu Grand Slam hi chu tournament dang nen a boruak a inang thei lo. Chak turin set thum lak a ngai dawn.

"Tun hnai ni 40 chhungin set hnih chauh ka khel, chuvangin ṭha taka khelh chhuah chu a harsa. Inbuatsaihna hun ka la neih chhung hian theihtawp ka chhuah chhunzawm ang," tiin August 29 aṭanga khelh tur US Open a thlir.

Season khat chhunga Grand Slam hnuhnung ber US Open-ah hian, kum 2010, 2013, 2017 leh 2019 te khan Nadal hi a lo champion tawh. Hard court inelna lianah hian sulhnu a neih ṭhat avangin inrintawkna sang tak nen a inlan thei ang.

Inkhel dangah Taylor Fritz chuan Nick Kyrgios 6-3, 6-2 a hnehin third round a inhlangkai. Australian tlangval Kyrgios hi tun hnaiah a khel ṭha a, a lakah beiseina pawh a sang. Mahse, Fritz hi kawng tinrengin a ngam lo.

World number 13 Fritz hian a match lehpekah chuan Andrey Rublev a hmachhawn ang. Russian tlangval Rublev hian inkhel inhnehtawk takah Fabio Fognini chu 6-7 (7-9), 7-6 (7-3), 6-2 in a lo hneh ve bawk a ni.

Seeded palina Stefanos Tsitsipas-a'n 6-3, 6-4 in Filip Krajinovic a hneh a, chak tura rinkai zinga mi Hubert Hurkacz erawh American tlangval, service nei ṭha tak John Isner lakah 7-6 (7-5), 6-7 (7-5), 6-2 in a chak lo.

Canadian player, seeded pasarihna Felix Auger-Aliassime chuan Alex de Minaur 6-3, 6-2 in a sawp. Amah ang bawka Canadian player Denis Shapovalov pawhin set a hloh hmasak hnuah 3-6, 6-4, 6-3 in Tommy Paul a hneh.

Shapovalov hian a match lehpekah chuan world number 1 Daniil Medvedev a tum dawn, inkhel a hmuhnawm khawp ang.