Lakers leh James an inrem

LeBron James chuan Los Angeles Lakers tan a khel zel dawn. The Athletic leh ESPN-in an tarlan dan chuan, American star hian season hnih cham turin Lakers tan contract a ziak dawn, a contract hlut zawng hi US dollar maktaduai 97.1 a ni ang.

An inremna anga a khel zo a nih chuan, 2024-25 season a nih meuh chuan LeBron hi a fapa Bronny nen NBA-ah kan hmu khawp hman hial mai thei, hetih hunah hian a fapa hi kum 17 mi a ni tawh dawn - player naupang tak ni mah se basketball inelna sang hmachhawn turin theihna a nei der tawh.

NBA Most Valuable Player atana vawi li thlan tawh hian, a contract thar hi a hmang zo a nih chuan a inkhelhna hlawh aṭang ringawtin dollar maktaduai 532 a lalut phak dawn tihna a ni - Kevin Durant khumin basketball khelh hlawh bika lalut hnem ber a ni ang.

Kum 37 mi James hian 2024-25 season thleng inkhelh a duh thu hi a lo sawi chiang tawh a, mahse a club khelhna tur chungchang erawh thuchhuah a la nei lo thung; a khelh mekna Lakers tan ani thlun ngheh theih hi chanchin lawmawm a tling.

Lakers hian James-a hoin 2020 khan NBA title an la. Mahse, a hnu lamah hliamin a tlak buak nasa a, season hmasa bik phei kha chuan a sang zual pariat zingah an tel phak lo - playoff an khel phak lo tihna a ni, season tharah erawh playoff khelh phak an tum ang.

James chauh a ni lo, hliam vang bawkin Anthony Davis pawh a inkhel mumal hleithei lo. Ani pawh hian season khat daih chauh contract a nei tawh. Lakers tan NBA champion team nei tur chuan James bakah Davis hi thlun ngheh a ngai dawn a ni.