Azarenka hnehtu Emma Raducanu

Serena Williams a hneh a, tunah chuan world number 1 hlui Victoria Azarenka a hneh leh ta. Emma Raducanu chuan Serena leh Azarenka a hneh inkar lakah hian darkar 24 pawh chawlhna hun a nei lo a, mahse tennis court chhungah a inkhel a nungin a hmuhnawm hle.

Nimin zing Cincinnati Open second round inkhelah Raducanu hian Azarenka hi 6-0, 6-2 in a hneh, a match leh pekah chuan Jessica Pegula a hmachhawn leh ang. A match hnuhnung pahnih thlir chuan Raducanu hmachhawn hi a châkawm lo ang.

British tleirawl Raducanu hian Serena lakah game li chauh a hloh a, an inkhelh zawh aṭanga darkar 18 hnuah Azarenka a hmachhawn leh nghal. World number 1 hlui lakah hian game hnih chiah hloh chungin hnehna a chang leh thei a ni.

World number 13 Raducanu chuan, "A zawna player ropui pahnih hneh chu a mak zawk ngei mai, mi ropui takte nen court-a kan intawng ṭhin hi ka tan chuan chawimawina a tling ṭhin, chumi bakah hnehna la chan phei chu a hlu lehzual.

"Set khatna kha duhthusama ṭhain ka khel, set hnuhnung zawkah game hloh ve mah ila harsatna lian tham a thleng lo. Ka tan chuan tun hnai ka match hnuhnung pahnih chu sawisel bo a ni," tiin a sawi.

August 29 aṭangin US Open an khel ṭan dawn, hmeichhe singles champion lai Raducanu hi tun hnaiah a khelh ṭhat avangin New York khawpuiah pawh rinkai a ni phak leh dawn, nomawi humhim tur erawh chuan a hautak ve thung ang.

Simona Halep chu hliam vangin a inhnukdawk a, Romanian star hi a malpui hliam vangin eng chen nge a chawlh dawn hriat a la ni lo. Kum 18 mi Coco Gauff pawh khup hliam vangin a chawl, a lan dan chuan Gauff hian US Open a khelh theih a rinawm loh.

Hmeichhe player ṭha - world number 1 Iga Swiatek, Wimbledon champion Elena Rybakina leh world number 5 Ons Jabeur te erawhin an khingpui ṭheuh hnehin last 16 an inhlangkai thung a ni.