Thiem leh Venus tan wildcard

US Open champion tawh pahnih Dominic Thiem leh Venus Williams te chu an ranking a hniam a, main draw khel phak lo zingah an awm. Mahse, hard court inelna lian hian duhsak takin wildcard an pe; qualifier khelh hah ngai loin US Open an khel thei dawn.

United Tennis Association (USTA) chuan - mipa singles lamah world number 172 Thiem bakah hian Sam Querrey, Emilio Nava, JJ Wolf, Ben Shelton leh Leaner Tien ten wildcard hi an dawng ve bawk.

US Open vawi hnih champion tawh Venus bakah - Australian Open champion hlui Sofia Kenin, CoCo Vandeweghe, Elizabeth Mandlik, Peyton Stearns leh kum 17 mi Eleana yu te chu pek an ni bawk a, an tan thil lawmawm tak a ni ang.

Tournament buatsaihtute hian an duhsak zawng hnenah wildcard hi an pe thei. An ram mi leh sate an duhsak ṭhin a, chumi bakah an tournament buatsaih tawha lo che ṭha ṭhin, mahse tun dinhmuna ranking hniamte an duhsak ṭhin bawk.

Austrian tlangval Thiem hian 2020 khan US Open nomawi hi a chawi, mahse a hnu lamah hliam vangin a buai. A banrek hliam zai a ni a, season khat aia rei a inkhel thei lo, a inkhelh leh theih hnuah pawh ngai a la awh leh thei lo a ni.

Hmeichhe player Venus hi kum 42 mi a ni tawh, 2020 hnua a vawi khat nan US Open hi a khel leh dawn. A vanglai pel deuh tawh mah se tualchhung mi a ni a, ṭantu a ngah dawn - player langsar ṭhenkhat barakhaih turin theihna a la nei ang.