Mbappe a hlawh tam - Ronaldo hlawh let a hlawh!
European football-a player langsarte hlawh hi awihawm lo khawpa tam a ni a, Kylian Mbappe chuan kar khatah £1,478,249 zet a hlawh. Mbappe hlawh tamzia hriat thiam theih dan Premier League striker ropui ber ang hiala an sawi Alan Shearer (£57,000) ai khan a let 25 chuang hretin a hlawh tam!
Thil awm dan chu
Kylian Mbappe hi eng vanga heti em em a hlawh tam nge, kan tih chuan Real Madrid vang a tih theih. Khawvel player ṭha ber ni chho thei tura theihna nei Mbappe hi Real Madrid ngaisangtu a ni a, Madrid-a kal a duh.
Los Blancos hian tun hma pawhin player langsar an hip a, an hmelma Barcelona aṭanga Luis Figo an chhuhsak bakah Manchester United aṭangin Cristiano Ronaldo, David Beckham, Ruud van Nistelrooy bakah khawvel huapa player langsar an lalut fo tawh.
Tun nipuiah pawh Mbappe hi Real pan ngei tura ngaih ni tawh mah se PSG-in an ngai ngam lo. Qatar sum mawma chawm PSG hi sum lamah an buai lo a, president Nasser Al-Khelaifi leh a hoten result ṭha an duh bakah club hlutna tihhniam a duh loh avangin sum hmangin Mbappe an thlem a, a hlawh duh zat a ziah theih nan 'cheque ruak' an pe tih hial a ni.
Mbappe vanneihna belhchhah nan PSG-in hlawh tam sa Lionel Messi an kawl a, hemi a nih avang hian hlawh phut san a awlsam. Mahni ṭha inti tawk tak Mbappe hian kar khatah pound maktaduai 1.5 dawn a hlawh tihna a ni a, hei bakah hian thuneihna a tel an la ti cheu bawk.
Messi hi Barcelona-a hlawh tam sa a ni a, 50% a a hlawh tihhniam a huam hnuah pawh Catalan club-in a hlawh an pek theih loh avangin Paris hi a pan. Argentina captain lakluh nan hian PSG-in transfer fee-ah sum an seng lo a, theihna sang tak a neih bakah player danglam bik a nih avangin Barca-a a hlawh ang bawr vel a la leh thei a ni.
Hlawh tam pathumna chu Neymar a ni a, PSG player tho a ni. French club hian Brazil superstar lak nan hian pound maktaduai 200 bawr vel an seng ngam a, chuvangin a hlawh pawh an pe sang. PSG hian hlawh sang 10 zingah player pali ngawt an thawh a, Real Madrid aṭanga an lakluh Sergio Ramos-a'n kar khatah £443,426 a hlawh. Ramos pawh hi 'MNM' ang thoa player special bik a ni a, defender a nih bakah a uai thla lam a nih avangin attacking player pathumte a pha lo deuh.
Hlawh pe tam United
Manchester United-in result ṭha an nei lo a, chutihrualin an player-te hlawh an pek dan thlirin result ṭha neih erawh an duh tih a lang. Cristiano Ronaldo chu hlawh tam palina a ni a, kar khatah £515,385 hlawhin Messi hlawh chanve vel chauh hlawh mah se Premier League-a hlawh tam ber a ni tih hriat a ṭha.
Ronaldo bakah hian David De Gea, Jadon Sancho leh Raphael Varane te chu hlawh tam zingah an tel pha a, hlawh tam hi khelh ṭhatna a ni lo tih lantirna a ni thei bawk. Goalkeeper theihna nei sanga tia sawi ṭhin De Gea hian tihsual a la neih fo bakah Spain squad-ah manager Luis Enrique-a'n a en kan tawh.
Sancho pawh a khelh ṭhat miau loh avangin Gareth Southgate-a'n tun hnaiah a ko lo a, Varane pawh France tan koh ni lo mah se ani erawh inhliam vang a ni thung. Chutihrualin an hlawh phu khawpin an khel chhuak lo tih chu an ṭhenawm club Manchester City aṭangin a lang.
Man City player zinga hlawh tam ber Kevin De Bruyne-a'n £400,000 a hlawh a, Ronaldo nen an inthlauhna hi £115,385 a ni pha. Hei hi player ṭha pangngai hlawh zat a ni pha daih. Nipui transfer-a Man United nena sawi zawm striker Benjamin Sesko khan RB Salzburg-ah kar khatah £4,500 chauh a hlawh a, kum 2023 aṭanga a khelhna tur RB Leipzig-ah pawh kar khatah pound nuai khat hi chu a hlawh pha kher lo ang.
Pep Guardiola hote hian hlawh an pe tam hran lo. Khawvel player hlawh tam 30 zingah Man City-in player pahnih chiah an nei a, an player lak thar striker Erling Haaland-a'n kar khatah £375,000 a hlawh. Man United hian Norwegian striker hi a hlawh let hlawh turin Ronaldo thlak nan an duh khawp ang, mahse football transfer hi sawi ang ngawta awlsam a ni si lo.
Europe club ṭha
Europe club ṭha ber chu Real Madrid tia sawi theih an ni a, season liam ta khan Carlo Ancelotti hote hian Champions League an champion bakah La Liga an champion. Los Blancos hian che ṭha turin player ṭha an kawl hnem ve bawk a, hlawh tam 30 zingah hian an player paruk an awm. Chungte chu Eden Hazard, Karim Benzema, David Alaba, Toni Kroos, Vinicius Junior leh Luka Modric te an ni.
Bayern Munich pawhin Bundesliga an thunun chhan chu an hlawh pek dan aṭangin a chiang a, player hlawh tam zingah paruk an lang pha. Liverpool aṭanga an lakluh Sadio Mane chu hlawh tam ber niin Manuel Neuer, Thomas Muller, Leroy Sane, Joshua Kimmich leh Serge Gnabry ten an dawt a, kar khatah pound nuai thum chuang vek an hlawh.
Sum lama talbuai Barcelona pawhin player pathum an thawh tho. Catalan club hian Frenkie de Jong chu a hlawhah £474,321 zet an pe a, Dutch midfielder chhuahtir an duh chhan a hriat theih. Player awm nghet sa Sergio Busquets leh Jordi Alba te pawhin pound nuai thum chuang tho an hlawh pha a, an player lei thar Robert Lewandowski te erawh an lang pha lo. Catalan club-in kar khata £150,000 vel lek hlawha Lewy an lalut thei hi thil mak a tling hial!