Chelsea lam ka ngaihtuah rih lo - Abraham

Tammy Abraham chuan tun dinhmunah a club hlui Chelsea lama kir leh tumna a neih loh thu a sawi a, a khelh mekna AS Roma tan ṭha taka khelh chu a tum hmasa leh pawimawh ber a nih thu a sawi chhuak.

Season hmasa nipui bazar lai khan Abraham hian Blues aṭangin Roma hi pound maktaduai 34-in a zawm a, an inrem dan chuan London club hian pound maktaduai 67 sengin an lei let leh thei ang tih a ni.

Chelsea tan hmun nghet chang lo mah se, a khelh mekna Roma-ah erawh a khel ṭha. Italian club tan hian season hmasa khan inelna hrang hrangah goal 27 a khung a, tun season-ah hmasawn lehzual a tum ang.

Kum 24 mi Abraham chuan, "Premier League lama kir leh hi ka ngaihtuah rih lo, ka kir leh dawn a nih pawhin a hmanhmawh thlak loh. Italy-ah hian ka hlim rih a, mitin kan inzah tawn avangin nuam pawh ka ti hle.

"Roma hian thil tum mumal leh sang tak a nei, chumi tih hlawhtlin tum chuan theihtawp kan chhuah. Player tharin kan squad pawh an rawn zawm zel a, tunah chuan season hmasa ai khan kan ṭha lehzual tawh bawk," tiin a sawi.

Jose Mourinho enkawl Roma hian Europa Conference League nomawi an chawi a, European nomawi an chawi hmasak ber a ni. Serie A lamah erawh beisei an phak lo - kuminah chuan Portuguese manager ho hian league champion nih an tum ngam ang.