Hun leh inrintawkna neih a ngai - Lacazette

Arsenal striker hlui Alexandre Lacazette chuan ṭha taka khel turin inrintawkna a ngai tih a sawi. Ligue 1 lama a kir leh hnuah Lacazette hian a match hmasa berah goal a khung nghal a, a club Lyon a chakpui.

Lyon hian zanin dar 12:30 hian Troyes an hmachhawn leh dawn, hnehna an chang a nih chuan an chunga awm Marseille leh Paris Saint Germain te khumin table hmahruaitu an ni lailawk rih ang.

Kum 31 mi Lacazette chuan, "Player tin hian inrintawkna kan mamawh tih chu hriat sa a ni a, chumi nei tur chuan inkhelhna hun kan mamawh bawk. Inrintawkna kan neih theihna tur kawng dang leh chu manager ten kan chunga rinna an nghah hian a ni bawk.

"Lyon lama ka kir leh hnuah chona thar ka hmachhawn a, ka chungah mawhphurhna sang tak a tla bawk. Kei leh ka ṭhiante hian kan hma lama hlenchhuah tur awm hi tih theih ngei kan tum a, huaisen takin kan hmachhawn zel ang," tiin a sawi.

Season hmasa khan Premier League bikah penalty chhiar tel loin Lacazette hian goal hnih chiah a khung. Arsenal striker thar Gabriel Jesus-a'n match hnih aṭangin goal hnih a nei der tawh a, hei vang hian Laca chungchang sawi a tam.

Mikel Arteta khan Lacazette bak chhawr tur a nei mumal lo a, mahse beisei anga a khelh theih loh avangin season tawp lamah chuan Eddie Nketiah a ring zawk - nipui bazarah chhuakin Laca hi a club hluiah a kir a, goal a khung hnuah inrintawnna a pawimawh thu hi a sawi a ni.