Man United-in Casemiro an la dawn

Manchester United-in season bul an ṭan chhiat uchuak avangin an talbuai a, English club mangang hi nipui bazarah si ruk lain an thawk chhuak. Thilmak a thleng zui a, khawvel defensive midfielder ṭha zinga mi Casemiro an hmin. Tuna thil awm dan hi a inthlak thut a nih loh chuan Brazilian midfielder hian Old Trafford a pan dawn.

Chutihrualin Man United hian Casemiro lalut tur hian sum an tawktarh hnem a, Spanish club leh Brazlian midfielder te hian English club talbuai hi sum siamna remchangah an hmang tia sawi theih dan a awm bawk.

Thil awm dan chu
Ni 100 liam ta khan Man United-in Frenkie de Jong laktumin hma an la ṭan a, tun thlengin an la hlawhtling lo. Tuna Casemiro an lak takah chuan Man United hian defensive midfielder ṭha an mamawh tih hre turin ni 100 bawr vel bawk an mamawh niah a ngaih theih hial.

Kum 30 mi Casemiro manah hian Man United hian euro maktaduai 60 an thehchhuak a, a che ṭhat dan a zirin a man hi euro maktaduai 10-in a la pung thei. Real hian tun season-ah Casemiro hi mamawh mah se Toni Kroos leh Luka Modric thlawp turin hmabak nei êng Eduardo Camavinga leh Aurélien Tchouaméni te an kawl. Tun hi sum siamna remchang a nih avangin Los Blancos tan United dawrna hi hnar phal chi a ni lo.

Casemiro tan pawh an sum tawktarh hi hnar phal chi a ni lo. Brazilian midfielder hian Real Madrid-ah nomawi chawi theih ang chu a chawi tawh. Champions League (5), La Liga (3), FIFA Club World Cup (3), Copa del Rey (1), UEFA Super Cup (3) leh Supercopa de España (3) nomawi a chawi tawh a, a sulhnu hnutchhiah hi a ṭha tawk.

Man United-in Casemiro hi club tana hlawh tam zinga tel turin an sawm. Cristiano Ronaldo-a'n kar khatah £515,385 a hlawh a, a hnaih bertu David De Gea-a'n kar khatah £375,000 a hlawh. Real Madrid-ah Eden Hazard (£508,143) a hlawh tam deuh a, goal khung khawl Karim Benzema pawhin kar khatah £390,254 a hlawh a, Casemiro erawhin kar khatah nuai thum a hlawh pha lo.

Brazilian midfielder hian Old Trafford a pan a nih chuan Real Madrid-a a hlawh phak ngai loh tur a hlawh dawn a, hei chauh hi a ni lo - kum 2026 thleng daih contract an zawrh bawk. Man United tan hian Casemiro hi khel ṭha kher lo pawh ni se sum ṭhahnem tak a lalut dawn tih erawh a chiang.

Mamawh chhanna?
Manchester United-in nipui bazar inhawn ṭantirhin Casemiro hming an lam ri lo a, Erik Ten Hag-a duh ber a ni lo tih a hriat theih. Chutihrualin Casemiro an lalut a nih chuan Dutch manager duh ber Frenkie de Jong an hawisan a ṭul tawh dawn a, right back leh second keeper an melh chhunzawm a rinawm.

Aaron Wan-Bissaka-a'n Dutch manager Ten Hag mit a tlung zo lo a, Diogo Dalot lah innghahna ber atana a la duap si avangin right back hi an mamawh. United hi match hnuhnung berah David de Gea chetsual avangin an mualpho a, Dean Henderson loan hmanga an chhuah avangin Spanish keeper elpui thei tur goalkeeper an mamawh hle.

Tuna zawhna awm erawh Ten Hag-a pressing football khel turin Casemiro hi a ṭha tawk em, tih a ni a, Dutch manager khelhtir ṭhin dan leh Brazilian midfielder khelh dan hi a inrem tawk lo tih hi football expert ṭhenkhatte ngaihdan a ni. Mahse, thil chiang erawh Casemiro hi Fred leh Scott McTominay te aiin a ṭha zawk.

Real Madrid-ah Casemiro hian hmun pawimawh a chang a, Toni Kroos leh Luka Modric te zalen taka an chet theih nan tlahrnung a pui. Casemiro-a'n no. 6 hna a chelh dan hi De Jong nen a inang lo a, a 'masala' chin chu Kroos leh Modric kutah a awm. Brazilian midfielder hian, "A dik alawm, Brazilian player ka ang lo," tiin a khelh dan chungchang hi kum 2017 khan a lo sawi tawh. United tan mamawh chhanna a ni em, tih chu hunin a hril dawn.

Engtin zel?
Nimin kha chuan Casemiro hian Real training a la zawm a, mah se minute 15 chiah hun a hmang. Dressing room-ah Brazilian midfielder hian a ṭhiante a mangṭha niin an sawi.

Real manager Carlo Ancelotti chuan, "Casemiro nen kan inbia a, chona thar hmachhawn a duh thu min hrilh. A thutlukna kan zahsak a, a thutlukna chu club chhuahsan a ni," tiin a chhuah tur thu a nemnghet.

Nimin lamah Casemiro hian medical a nei rih dawn lo tiin an ziak a, vawiin lamah Brazilian midfielder hian a ṭul ang a tihfel theih beisei a ni. Man United hian Thawhṭanni zan hian an hmelma Liverpool an mikhual dawn a, Casemiro erawh a la inlan thei lo ang.