Newcastle mikhual tur Manchester City

Pathianni zan dar 9:00-ah Newcastle United-in St James' Park-ah Manchester City an mikhual dawn. Magpies tan Premier League champion laka an khelh dan hi an hmalam hun tehna ṭha tak a ni thei ang.

Nikum khan Magpies hi Saudi Public Investment Fund-in an lei a, club neitu hausakna hi pound tluklehdingawn 320 anga chhut a ni a, a hnaih bertu Manchester City neitu Sheikh Mansour (£22.9tld) nen a inthlau hle. Club neitute sum neih dan thlir chuan Newcastle hian hmabak an nei êng a, amaherawhchu khelmualah erawh Magpies leh City inkar a la zau hle.

City-in Erling Haaland an lalut a, Norwegian striker hian en bik a hlawh. Borussia Dortmund striker hlui hian Premier League match hmasa berah goal hnih khung nghal mah se Bournemouth lakah erawh vawi riat chiah ball a khawih a, vawi hnih chiah pass a nei.

Newcastle lakah Haaland hian pressure a ngah dawn. Chutihrualin Magpies hi pressure nei lo tawp an ni lo. Season liam ta kha chuan relegation battle-ah an tel a, tun season-ah erawh Europe inelna khel thei tura an inpettlin zawh loh pawhin 'top 10' a lan a ṭul.

Transfer boruakah Bruno Guimaraes pawh Real Madrid nen sawizawm ni mah se coach Eddie Howe chuan, "Hralh kan tum lo bur. Team hlawhtling tak din turin hma kan la a, kan player ṭhate hi kan hralh lo ang," tiin a sawi a, player lakluh an la tum thu a sawi bawk.

Nikum December thla khan Man City hian St James Park-ah 4-0 in hnehna an chang a, tun ṭumah pawh hian Pep-a hote hi chak zawk tura rinkai an ni ang. Chutihrualin Newcastle hi tun season-ah an la tlawm lo a, kai thar Nottingham Forest hneha bul an ṭan hnuah Manchester United hnehtu Brighton nen goal awm loin an inhnehtawk.