Mike Dean-a'n a tihsual a pawm

Chelsea leh Tottenham Hotspur te 2-2 a an inhnehtawkna inkhela video assistant referee Mike Dean chuan tihsual a nei tih a pawm a, Spurs defender Cristian Romero-a'n Chelsea full back Marc Cucurella-a sam a pawh (kek) khan referee Anthony Taylor chu khelmual sira monitor (inkhel ennawnna) en tura hrilh tur a nih thu a sawi.

Spurs-in Harry Kane hmanga an si phurh an sut hmain Romero hian Cucurella sam a kek a, Dean-a'n referee Anthony Taylor hrilh loin, inkhel a kaltlang tir a, Chelsea ṭantute an lungawi lo hle.

Dean chuan, "Second rei lotê chhungin thutlukna ka siam a ngai a, a tirah khan tharum thawhnaah ka ngai lo a ni. Mahse, a hnuah kha thil thleng kha ka ennawn a, referee dang ka titipui a, ka thlirkir hian Taylor kha mual sira monitor en tura lo hrilh mai tur ka ni - khelmuala referee-in thutlukna tawp chu an siam ṭhin a ni," a ti a, Chelsea tan Dean-a tihsual pawm hian awmzia a nei tawh lo.

Blues coach Thomas Tuchel chu lungawi lo fal zingah a tel a, nakin zelah referee Taylor chu Chelsea inkhel enkawl tawh lo tura a duh thu a sawi vangin Football Association chuan Tuchel-a hi a ṭawngkam avangin an chhui mek.

Tuchel hi inkhelh zawhah Spurs coach Antonio Conte nen an intihiam lo bawk a, Coach pahnih hi FA chuan an chet dan chu a mawi lo tiin thubuai a siamsak - Ningani zan thleng kha insawifiahna hun an pe a, eng ang takin nge an hrem dawn he thu buatsaih a nih lai hian kan hre hman lo.