Chelsea-in Auba an hnim hnai

Premier League champion tum Chelsea-in nipui transfer-ah duhtawk mai an tum lo a, Barcelona striker Pierre-Emerick Aubameyang chu lakluh tumin an dawr mek - he thuziak i chhiar meuh chuan an inlalut fel tawh hial mai thei.

Arsenal captain hlui Auba leh Chelsea hi Ningani zan khan an inhmu a, journalist rin tlak Fabrizio Romano tarlan dan chuan player leh club inkarah thu inhmu lo a awm lo.

Romano chuan, "Ningani zana Auba leh Chelsea indawrna chu a kaltluang hle niin hrilh ka ni a, mimal thilah inrem lohna tur a awm lo a, Chelsea leh Auba hi contract chungchangah chuan an thu a inhmu hle a ni," a ti.

Chelsea hian Auba lalut turin Barcelona an dawr zui dawn nia sawi a ni a, Catalan club-in euro maktaduai 30 an chhiar erawh London club hian to an ti hret, niin Romano chuan a sawi.

Kum 33 mi Aubameyang hian Arsenal-ah season nga zet hun a hman chhungin match 163-ah goal 92 a khung a, mahse, season hmasa chawhnu lam khan coach Mikel Arteta nen an inhmu thiam lo.

February 2022 khan Arsenal chhuahsanin Barca a pan a, June 2025 thleng cham turin contract ziak mah se, inbiakremnaa June 2023-a a chhuah theih dan tur an ziak tel.

Chelsea hian Auba-a'n free transfer-in Barca a pan tih an hre ve reng a, a kum a tam ve deuh tawh bawk avangin man to taka lei an tum lo - €14mtd a an dawrna hmasa ber chu hnar a lo ni tawh a, €27mtd tala lakluh theih erawh an la inbeisei.

Auba hian Catalan club tan hian season hmasaah khan match 23 khelin goal 13 a khung a, theihna a la nei reng - Chelsea boss Thomas Tuchel kaihhruaina hnuaiah Borussia Dortmund-ah a lo khel tawh bawk a, Stamford Bridge-ah a tlangnel nghal thei dawn.

Gabonese striker Auba hian Barcelona-ah Robert Lewandowski nen khelhna hmun inchuh a hreh loh thu ualau takin a lo sawi tawh a, mahse, Chelsea hian Barca aia hlawh pek tam an inhuam niin an sawi.

Auba hian Arsenal-ah khan kar khatah £350,000 vel a hlawh nia sawi a ni a, Barca-a zawm khan kar khatah £80,749 vel a hlawh niin an sawi thung - Chelsea-ah hian a hlawh a sang ngeiin a rinawm a, a zat tur tak erawh tarlan a la awm lo.

Premier League-a an match hnuhnung bera 'hot' taka Tottenham Hotspur nena 2-2 a inhnehtawk Chelsea hian Pathianni zan dar 6:30-ah league match an khel dawn a, Leeds United an lenchilh ang.