Paris Saint-Germain chhungkua an buai? Lionel Messi+Neymar vs Mbappe

'Kei ka ni, kei aia ṭha hi khawvelah an awm lo - number 1 ka ni' tih rilru pu awmkhawm an ni a, midang an ngaisang vak bik hlawm lo. Lionel Messi, Neymar leh Kylian Mbappe te inkar a ṭha tawk lo niin a lang.

Paris Saint-Germain hian player ṭha leh hlawh tam, khawvela footballer hlawh hnem pathum an kawl khawm. Manager Christophe Galtier mai bakah club thuneitu lam thlengin player chungchangah an inrawlh ṭhin nia sawi a awm, boruak ṭha tak an ni lo tih chu thup theih a ni lo.

Tun hnai khan Wayne Rooney a rawn ṭawng chhuak a, hei hian titi a titam zui. Manchester United legend chuan, "Kum 23 mi bawr velin zah lo takin Messi chu a darah a nek vel a maw, heitang em ema thil mak hi ka nunah ka la hre ngai lo.

"Tu emawni khan hei hi lo hrilh teh u, kum 22 mi a nihin Messi chuan Ballon d'Or vawi li a dawng tawh," tiin Mbappe chet dan chu na takin a sawisel a, a thusawi hian English media a luah khat hneh hle.

Penalty inchuh
Real Madrid nen nasa taka sawi zawm an nih hnuah Mbappe chuan PSG tan contract thar a ziak a, an inremnaah hian khawvela footballer hlawh hnem ber a ni. A hlawh bakah hian thuneihna tam tak an zep tel ang tih a rin theih, tarlan ni lo mah se an chelh theih chhan nia ngaih a ni.

Hliam vangin France inter-national hian pre-season a hmang ṭha lo, match hmasa berah phei chuan a inlan lo. Match hnihnaah Montpellier an tum a, he inkhelah hian PSG lamin penalty an hmuh hmasak chu Mbappe hian petin a hlah.

Penalty an hmu nawn leh a, forward Neymar-a'n ball a la hmak. Brazil international-in penalty a pet hmain Mbappe hian a va bia, penalty pet a dil niin a lang. Mahse, Neymar hian ball a pe lo, Brazilian forward hian petin goal-ah a chantir.

Neymar hian penalty chungchangah tun hma pawhin buaina a nei tawh. Edinson Cavani nen penalty pet an inchuh tawh, tun ṭumah pawh Mbappe nen an inchuh leh a, mipui hmaa buaina siam a hreh lo tih chu hriatsa a ni.

Montpellier lakah bawk hian, counter attack hmangin PSG lamin na takin an nawr let. Tlarhma lama changtu nei lo Mbappe hi ball an pe duh lo (?) niin a lang, a ball chan ngei tur nia lang an pek loh vang hian a titau, tlan zui loin a kun daih.

A la tawp lo
Mbappe leh Neymar hi inkhelh banah an inhnial zui niin an sawi, dressing room lamah an ṭawng zui rei avangin senior player Sergio Ramos a inrawlh nia sawi a awm bawk, a chhungril lam boruak erawh chiang taka tarlan a ni lo thung.

A player-te chungchangah PSG coach Christophe Galtier-a'n sawi a la nei lo. Season ṭan hma khan Messi pawimawhzia leh, season hmasa aia an chhawr ṭangkai zual tur thu a sawi a, tun hnai khan Mbappe chu 100% a fit a la nih loh thu a sawi bawk.

Galtier tan chuan Messi, Neymar leh Mbappe inkar chinfel hi thil awlsam a ni lo mai thei. Chingfelin ṭha taka a kaihruai thei a nih erawh chuan khawvela hmatawng hlauhawm berah a din thei ngei ang tih erawh sawi ngam a ni.

Messi leh Neymar hi Barcelona tana khel dun tawh an ni a, ṭhian inkawm ngeih tak an ni bawk - South American player an nih avangin an inṭan bawk. Anni pahnih hi an ṭangrual tlat a nih chuan midang tan beih an harsa ang.

Mahse, Mbappe hi a kum a la tlem deuh a, hmabak la nei thui a nih avangin PSG lamin an theihtawpa an chelh a ni. A contract-ah thuneihna an pe tel takzet a nih chuan a hmang duhin a rinawm, a hmang a nih chuan nghawng na tak a nei ngei dawn a ni.

Buaina Neymar?
Neymar hi player ṭha leh thiam bik a ni, mahse a nungchang leh khawsak dan phung vangin a phu ang tawk zahna leh chawimawina pawh a dawng lo. A ṭha ber nih tumna a nei hran lo a, chuvangin lemchan thiamte nun anga hun hman mai pawh a hreh lo.

Season laklawh lai pawh ni se kum tir lamah hian Brazil lama haw a duh ṭhin, hliam emaw hrem emaw vang talin a haw deuh ziah. Mi tam tak chuan Neymar hian PSG a hmangaih tawk lo a, sum tam tak hlawh chunga nawm chen nan chauh a hmang niin an sawi.

Neymar khawsak dan phung hi Mbappe chuan a ngaithei lo niin an sawi bawk. France international-in contract a ziah dawn khan Neymar hi chhuak se a duh niin media lamin an tarlang, a hnu lawkah Neymar hian a contract neih lai hman zawh a tum thu a sawi ve hmak.

Tun hnai khan social media lamah Mbappe-a penalty hlah sawiselna chungchang chu Neymar hian a lo 'Like' keuh bawk. Langsar takin an insawisel tawn rih lo a ni mai thei, an rilru chhungril ah erawh an inthik bakah an inel hle tih a chiang.

Hlawh hnem zawk Mbappe hi thu zawk tura ngaih chu a ni. Chutihrualin Neymar hian season hnih daih contract a la nei, buaina chingfel loa an kal zel a nih chuan Mbappe pawhin kum hnih chhung chu harsatna a tawk zui ve mai thei bawk.