Raducanu zinkawng a tawp leh ta

Ropui takin player ṭha pahnih hneh thei mah se Emma Raducanu a chak reng thei bik lo. Nimin zing Cincinnati Open last 16 inkhelah Raducanu hi Jessica Pegula hneh loin a zinkawng a tawp.

Serena Williams leh Victoria Azarenka a hneh avangin tun hnaiah Raducanu thawm a ring zual. Mahse, seeded pasarihna Pegula hian rilru dang a la nei, a khingpui hi chak tir ngawt a tum bik lo, a tir aṭanga che fuh zawk niin 7-5, 6-4 in a hneh.

Kum 19 mi Raducanu tan tunah chuan US Open nghah a ni ta mai, champion nomawi a kawl mekna hi August 29 aṭangin New York khawpuiah khelh ṭan a ni dawn - champion nawn leh tur chuan hmasawn a ngai dawn, vanneih tel a mamawh bawk ang.

British tleirawl Raducanu chuan, "Tun hnaia ka tournament khelh hrang hrangah hmasawnna ka nei, hma ka sawn dan kawng erawh a inang lo fur. US Open kan khelh hunah chuan ka hmasawnna hrang hrang hi a ṭangkai vek ang," tiin beisei a neih thu a sawi.

Hmeichhe inkhel dangah world number 1 Iga Swiatek pawh a chak lo. French Open champion Swiatek hi Madison Keys lakah 6-3, 6-1 in a chak lo - American player Keys hian tennis a khelh hun chhungin world number 1 a hneh vawi khatna a ni hial.

Keys hian quarterfinal-ah Elena Rybakina a hmachhawn leh dawn. Wimbledon champion Rybakina hian inkhel dangah Alison Riske-Amritraj chu 6-2, 6-4 in a lo hneh ve thung a ni.

Player langsar dang Petra Kvitova pawh a chak a, mahse seeded pahnihna Anett Kontaveit erawh Chinese nula Zhang Shuai hneh loin a zinkawng a tawp ve thung. Cincinnati Open hi US Open inbuatsaihna zinga tournament lian leh hnuhnung a ni.