Saliba dahsangtu Xhaka

Arsenal midfielder Granit Xhaka chuan an defender William Saliba a dah sang hle a, a kum la naupang deuh mah se khelmual chhungah a puitling tawh a, hruaitu ṭha tak a ni tel bawk tih a sawi.

Saliba hian 2019 khan Gunners hi a zawm, khelhna hmun nghet a chan mai loh avangin Ligue 1 lamah intuaihriam turin a kir. Season hmasa khan Marseille tan a khel ṭha takzet - Ligue 1 Young Player of the Year atan an thlang hial.

Kum 21 mi chauh la ni mah se Mikel Arteta-a'n a ringtawk tawh a, tun season chu an rinrawl a ni chho dawn niin a lang. Crystal Palace lakah man of the match a ni a, match hnuhnunga Leicester City an tum ṭum erawhin anmahni lamah a tilut.

Foxes lakah pawh Saliba hi a khel chhe lo, tlarhnung laiah a dingnghet hle. Xhaka chuan, "Tihsual leh tihpalh hi chu football-in a ken tel a ni a, chuvangin kan lama a tih luh avang khan demna tur ka hre lo.

"Kum naupangte ni chungin tawnhriat a nei ṭha tawh. Premier League inelna hautak tak hmachhawn tur pawhin a ṭha tawk tawh a, hruaitu ṭha tak a nih telna hi a pawimawh zual," tiin Saliba a dahsan thu a sawi.

6ft 4in a sang defender hi EPL match pahnihah chuan tlarhnung laia rinrawl a ni, ball kang tauh chhuak tura a ṭhat bakah a che rang a, ball pass a thiam bawk - Arteta hian a chhawr thiam a nih chuan team ti ṭha phak tur chu a ni ang.

North London club hian season bul an ṭan fuh, champion lai Manchester City nen chiah match hnih an khelh tawh china chak ve ve thei an ni. Zanin dar 10:00 hian Bournemouth an lenchilh dawn a, point thum hmuh tumin Dean Court an pan dawn a ni.

Scott Parker-a enkawl Bournemouth hi Man City laka mualpho hlim an ni a, chetsual nawn an duh lo ang; August 27, Inrinniah Liverpool an lenchilh zui leh dawn bawk avangin an tan season tir lam fixtures a hautak takzet.