Barca tan insiamrem a ngai
European club langsar zinga leiba ngah ber pawl ni chungin Barcelona-in nipui transfer-ah sum an ren lo a, he thu buatsaih a nih thleng hian pound maktaduai 150 chuang player lakluh nan an hmang tawh!
Mahse, Catalan club hian European striker 'hot' ber pawl Robert Lewandowski meuh an thlem lut chungin khelmualah an beisei ang result an nei thei lo a, an league match hmasa berah goal an khung lo!
Xavi enkawl team hian an mikhual Rayo Vallecano chu 0-0 in an inhnehtawkpui a, hetihlai hian an elpui Real Madrid (2-1) leh Atletico Madrid (3-0) erawh an match hmasa berah an chak thung a, Barca tan Pathianni zan dar 1:30-a Real Sociedad an lenchilh hunah chak ngei a ṭul tawh.
Zanin dar 1:30-ah Real Madrid an inlan dawn a, khualmualah Celta Vigo an lenchilh dawn a, Atletico Madrid chuan Pathianni zan dar 11:00-ah team ṭha Villarreal an mikhual ve bawk ang.
Buaina hmasa
Barcelona-in nipui transfer-ah Robert Lewandowski, Raphinha, Andreas Christensen, Franck Kessie leh Jules Kounde an lalut a, Ousmane Dembele leh Sergi Roberto chu contract thar an ziahpui bawk.
Leiba neih vanga team talbuai mek hian an lakluh aia sum an hman hnem avangin an player zawng zawng pawh La Liga ṭan dawnah an ziak lut lawk thei lo a, Rayo Vallecano an hmachhawn hma khan player ziak lut turin euro maktaduai 100 lakluh an la mamawh!
Mahse, August 12-ah Catalan club-in Barca Studios-a share 24.5% chu Orpheus Media hnenah €100mtd-in an hralh a, Rayo Vallecano hmachhawn hmain Lewandowski, Raphinha, Christensen, Kessie, Dembele leh Sergi Roberto an ziak lut hman.
Nou Camp-a Rayo nena an inhmachhawnah Xavi-a'n a player ziah luhte hi a chhawr nghal vek a, mahse, tlarhmaah Lewy meuh an nei chungin goal an khung lo - Real leh Atletico an elpui miau avangin vawi khat chetsual a pawi viau thei.
An la buai cheu!
Barca-in Rayo laka goal an khung theih loh chhan thlirin, an player tharte an ziak lut har lutuk chuan an rilru lamah nghawng a nei em ni chu aw, tih mai tur a ni a, zaninah chuan inrintawkna tam zawk nen player tharte an inlan thei ang.
Mahse, hetiang boruak karah hian Barca-in an player lak thar zingah ziah luh theih loh an la nei cheu a, a hming chu Kounde a ni - Chelsea aia Catalan club thlangtu defender ziak lut tur hian €20mtd an mamawh belh niin an sawi.
Barcelona vice-president Rafa Yuste chuan kar tir khan Real Sociedad an hmachhanw hmaa Kounde an ziahluh hman tur thu a sawi a, mahse, he thu buatsaih a nih thleng hi chuan ziahluh a la ni lo.
Spanish journalist Alfredo Martinez chuan Barca hian Kounde ziak lut turin €20mtd an mamawh niin a sawi - Pathianni zan an inlan hmain Barca hian khawi aṭangin nge, heti zat sum an hmuh belh ang, tih chu zawhna awm thei a ni.
A kalphung
Tarlan tawh angin Barcelona-in La Liga match hmasa bera player lak tharte an chhawr theih nan Barca Studios-a 24.5% chu Orpheus Media hnenah €100mtd-in an an hralh a, hemi hma hian Barca Studios-a 24.5% share chu Socios.com hnenah €100mtd-in thoin an hralh tawh.
Hei chauh a ni lo - domestic television rights 25% chu investment firm Sixth Street hnenah kum 25 chhung atan an hralh bawk a, share neuh neuh hralh aṭanga an sum hmuh belhkhawm hi €700mtd a tling.
Mahse, La Liga-in dan khirh tak an nei - club-in player lei ngawt mahse, ziak lut turin an sum hmuh leh hman a inbuk tawk a ngai a, hei hi player-te hlawh an pek ngei theih nana kalphung a ni pakhat.
Kounde hian Barca-ah kum khata €9.5mtd hlawh turin contract a ziak a, a man zat €50mtd niin, kum nga atan contract a ziak a, a man hi 'amortization quota' tih hmangin kum khatah €10mtd zela ṭhensawm a ni a, chumi awmzia chu Barca hian Kounde enkawl turin kum khatah €20mtd vel an mamawh tihna a ni a, Kounde ziak lut turin heti zat sum an lakluh leh phawt a ngai.
Khelmual hawi ila
Barcelona-in Vallecano nen an inkhelah ball an chang tam a, mahse, a pawimawh ber goal an khung lo - vawi 21 zet shot an nei a, mahse, heng zinga vawi ruk chiah hi target-ah a kal a, a ropui tawk lo.
Chutihrual chuan Barca hian Kounde ziak lut lo ta pawh ni se, match hmasa bera rilru thlamuang loa hun tam tak hmang Lewy, Raphinha, Christensen, Kessie, Dembele leh Sergi Roberto ten rilru hahdam takin Pathianni zanah match an khel thei tawh dawn a, an tawh a khirh sawt ang.
Mahse, Catalan club hian Vallecano laka red card hmutu captain Sergio Busquets an chhawr thei dawn lo a, chhuahtir an duh, mahse, chhuak duh lo Frenkie de Jong an chhawr a ngaih a rinawm.
Hriat tel tur chu Sociedad hi team ṭha an ni - an match hmasa berah 1-0 in Cadiz an hneh a, he team hian Japanese winger beiseiawm Takefusa Kubo, Manchester City legend David Silva, Swedish forward Alexander Isak leh Spain international Mikel Merino neitu an ni.
Real lam hi
UEFA Super Cup nen season bul an ṭan a, coach Carlo Ancelotti-a'n inelna an telna zawng zawngah nomawi chawi vek an tum thu a sawi avangin European champion team hi hmachhawn an châkawm lo.
Mahse, Real hian an league match hmasa bera kai thar Almeria hneh turin vanneihna an mamawh tel a, goal an chhuah hmasak zet hnuah 2-1 in an chak hram - zaninah he team hian insiamṭhat an mamawh.
Celta hian striker chhuanvawt Iago Aspas an la nei a, Liverpool striker hlui hi Celta-a a kir leh hnuah match 266 khelin goal 135 a khung tawh a, Real tan ven bik a ṭul ang.
Chutihrual chuan Real Madrid hi Karim Benzema leh Vinicius Junior neitu an ni tih hriat a ṭha a, Celta khelmuala inlan tur mah ni se khualmuala hnehna chang turin an ṭha tawk.
Atletico beiseina
Diego Simeone enkawl Atletico Madrid-in season bul an ṭan ṭha takzet a, an league match hmasa berah khualmualah inlan mah se Getafe chu khualmualah 3-0 in an hneh.
Atletico fan-te lawmna tizual turin, Juventus-a loan-a a hun a hman zawh hnua lo kir Alvaro Morata chuan goal hnih a khung a, Antoine Griezmann chuan goal khat a khung a, Joao Felix chuan goal thum hi a assist vek bawk!
Chutihruala hriat tel tur erawh Villarreal hi team ṭha ve tawk tak an ni, tih hi a ni a, he team hian Atletico ang thoin an match hmasa berah goal thum an khung a, Real Valladolid chu 3-0 in an hneh.
Villarreal tan hian Alex Baena chuan goal hnih a khung a, Nicolas Jackson chuan goal khat a khung bawk - he team hian season hmasa khan Champions League semifinal an khel a, Unai Emery kaihhruaina hnuaiah beiseina an nei sang hle.