Player kan hralh tawh lo ang - Inter CEO

Inter Milan CEO Beppe Marotta chuan tun nipui bazar chhungin player an neih sa hralh an tum tawh lo tih a sawi, hei hi an manager Simone Inzaghi duh dan a nih thu a sawi tel bawk.

Tun nipui bazar chhungin Inter hian Alexis Sanchez, Ivan Perisic, Andrew Gravillion, Michele Di Gregori, Henrikh Mkhitaryan leh Andrea Ranocchia te an chhuahtir tawh a, an striker hman thiam Romelu Lukaku chu Chelsea aṭangin loan-in an lalet thung.

Italian club hian player lian leh langsar dang lalut turin sum an nei tawk lo - club neitu Chinese sumdawng hausa hnen aṭangin sum lama puihna an dawng ṭha tawk lo niin an sawi, hei vang hian an neih sa humhim theih a pawimawh hle a ni.

Inter CEO Beppe Marotta chuan, "Team ṭha leh ngelnghet tak neih kan duh a, team lian dangte el phak nih kan tum bawk. Nipui bazar atan ni 15 vel hun a la awm a, hemi hun chhung hian player an chhuak tawh lo ang.

"Season hmasa khan uiawm takin Serie A nomawi kan chawi phak lo, chuvangin kan nihna ang tak kan lantir leh a ngai," tiin a sawi a, hnehna chan leh champion nomawi chawi chu Inter Milan nen thil inzawm tlat a nih thu a sawi bawk.

Inter Milan hian zanin dar 12:15 hian San Siro-ah Spezia an mikhual ang.