Quarterfinal-ah Medvedev a lut

Daniil Medvedev chuan 2022 Cincinnati Masters khelh laiah quarterfinal a lut. Russian star hian nimin zing khan Denis Shapovalov chu straight set hmangin a hneh a, inkhel dangah Stefanos Tsitsipas pawh a thiam pariat zingah a inhlangkai ve bawk.

Kum 26 mi Medvedev hian darkar khat leh minute 45 chhungin Canadian tlangval Shapovalov hi 7-5, 7-5 in a hneh a, tun season atan ATP Masters 1000 bika quarterfinal a luh vawi hnihna a ni chiah.

Kar hmasa a khelh zawh tak Montreal Masters-ah khan Medvedev hian Nick Kyrgios a ngam lo. Tunah erawh world number 1 hi a khel ṭha leh tawh hle a, tun hma lama a backhand ṭha leh nghet tak ang kha a nei leh tawh.

Russian player Medvedev chuan, "Kan inkhel tawk hle, kei aiin point hmuhna tura a hlah hnem zawk hret a, kha chauh kha kan danglamna a ni. Player ṭha tak kan hmachhawn chang hi chuan chak turin vanneih tel a ngai ṭhin," a ti.

Quarterfinal-ah chuan Medvedev hian Taylor Fritz a hmachhawn dawn. American tlangval hian inkhel dangah Andrey Rublev chu 6-7 (4/7), 6-2, 7-5 in a lo hneh ve thung a, an inkhel tur hi a hmuhnawm ang.

Match lehpek thlir nghalin Medvedev chuan, "Taylor hi player ṭha tak a ni, tun hma erawhin singles match kan la khel lo thung. Ani hneh tur chuan a ṭha thei ang bera khelh a ngai dawn, tihsual neih tam a remchang dawn lo," a ti.

Western & Southern Open inkhel dangah Stefanos Tsitsipas a che fuh chhunzawm. Greek tlangval hian Diego Schwartzman chu 6-3, 6-3 in a hneh a, kum hnih chhung a zawna semifinal a thlen theihna a nih avangin a tan chuan hmun nuam a tling.

ATP Finals champion hlui hian a service a hum ṭha, a khingpui service pawh a chhaih buai hneh hle. Break point vawi 14 a hmuh zinga panga a chhawr ṭangkai thei a, a ball vuak na tak chu hnehna chan phah nan a tawk.