Bayern an ṭha mah mah em?

Bundesliga-ah Bayern Munich hi kum zawnin vawi 10 an champion tawh a, tun season-a an champion leh a nih chuan a zawna vawi 11 an champion-na tur a ni ang. Bavarians hian tun season pawh bul an ṭan ṭha a, Europa champion Eintracht Frankfurt 6-1 a an sawp hnuah Wolfsburg 2-0 in a hneh leh tawh. Champion sawi nan la hma deuh mah se an record ṭha tak avang hian Julian Nagelsmann-a hote tan champion rim a nam leh ṭan der tawh.

Germany-a inelna sang ber Bundesliga-ah hian Bayern hi vawi 31 a champion tawh a, German top flight hrim hrimah vawi 32 an champion tawh. Bavarians hnaih bertu FC Nurnberg-in vawi kua nomawi an chawi a, Borussia Dortmund (8), Schalke (7) leh Harmburger (6) ten an dawt. Bayern hi anmahni hnaihtu club pali aiin an champion tam zawk.

Tun season-ah Bayern-in Robert Lewandowski chan mah se Sadio Mane an lalut a, Senegalese forward hi a ṭangkai nghal hle. Bavarians-in match tam la khel lo mah se season dang ang thoin league an thunun leh dawn niin a lang a, ṭum dang ang bawka an thunun leh a nih chuan Bundesliga hlutna a tlahniam thei ang.

Bundesliga-ah Bayern ni lo club dang tan champion theihna chance a awm theih nan rawtna te a awm chho hial. Ṭhenkhat chuan league-a point hmu sang ber hi champion nghal loin playoff hmangin champion zawn leh ni se tiin an rawt a, hei hi Indian Super League leh Mizoram Premier League kal hmang ang hi a ni. A ṭhen erawhin inkhel apiangin Bayern hi 1-0 in hnufual nghal se an ti bawk.

Engpawhnise tuna rawtna ang hi chu a taka thleng tur a ni lo, chutihrualin Bayern hian Bundesliga hi an thunun reng a nih chuan inelna kalhmang erawh an la thlak thei hial ang. Julian Nagelsmann-a hote hian August 21, Pathianni zan dar 9:00 hian Bochum an hmachhawn ang.