Bazar ṭhulh thei lo Forest

Premier League kai thar Nottingham Forest 'mood' a fuh laklawh a, Krismas bazar laia ni tin bazar tura chhuak ang mai an ni - nipui transfer-a an player lakluh 16-na ni turin Wolverhampton Wanderers midfielder Morgan Gibbs-White chu nimin khan an lalut.

Forest hian an player thar man zatah hian pound maktaduai 25 an pe phawt a, a khelh ṭhat dan a zira a man hi £17mtd la pek belh leh tur a ni - Forest player man to ber record a siam nghal.

Kum 22 mi midfielder hian kum nga chhung cham turin contract a ziak a, Wolves academy chhuak player hi Forest hian an rimna a rei tawh avangin man to taka an lalut ngam hi a mak hran lo.

England tana age level hrang hranga lo inlan tawh Gibbs-White hian season hmasa kha Championship club Sheffield United-ah loan-in a khel a, inelna hrang hrangah match 37 khelin goal 12 a khung a, assist vawi 10 neiin, Championship playoff semifinal-a Forest nen an intawn ṭumin goal a khung nghe nghe.

Nottingham Forest hian zanin dar 7:30-ah league match khel turin Everton an lenchilh dawn a ni.