En teh, a lo her chhuak leh dawn ta - United vs Liverpool chu!

Premier League-in tun hnaiah team ṭha tak tak a hmu a, hmana 'Big Four' tih ṭhin pawh kha 'Big Six' tiin Manchester City leh Tottenham Hotspur thun belh an ngai a, inelna a hautak tawh hle.

Mahse, inkhel boruak sang leh ropui tak tak karah pawh, team dang zawng inkhel aia ngaihven la hlawh bik reng a awm a, chu chu Manchester United leh Liverpool inkhel a ni - eng 'level' pawh ni se team pahnih intawng hi a tenau thei lo hrim hrim.

Chutiang taka boruak nei lian club pahnih chu zanin dar 12:30 hian an intawng dawn a, Old Trafford-ah United hmachhawn turin Liverpool an lenglut dawn - inkhel a hmuhnawm loh ring suh.

Tun hnaia team pahnih ropuina khaikhin rual ni lo mah se, tun season-ah erawh mak takin United leh Liverpool ten inanna an nei - an league match hmasa pahnihah an chak zo lo ve ve! Zanina chak loh chu football fan-te nuihzabur ni tura inpekna chauh a ni dawn a, club pahnih tan an zahawmna hum turin chak ngei a ṭul.

Team talbuai
United fan-ten coach thar Erik ten Hag an neih avangin beiseina sang tak nen bul an ṭan a, mahse, an match hmasa berah Brighton & Hove Albion chu 2-1 in an ngam lo a, 'tihsual palh' ti pawhin a la thlir theih cheu.

Mahse, United hian English top flight league-a tawnhriat nei tlem ber pawl Brentford chu an ngam lo zui a, an ngam lo a ni satliah lo - goal li zet an chhuah a, goal an khung ve lo.

United mualphona hi a sang lutuk a, en liam mai chi a ni lo. Brentford laka an tlawm zawh hian coach Ten Hag chu na takin a ang a, "Player quality tak kan mamawh a ni," a ti a, a neih sa a duh khawp lo hle.

Dutch coach hian, "Theih ni se, an vaia thlak ka duh a ni," tiin Brentford nen an inkhelh laiin a player-te lakchhuah vek a châk thu a sawi a, an pu rinna hlawh let leh turin United tan zaninah chak a ṭul.

United an ṭang
Ten Hag hian Brentford an ngam loh avangin kar hmasa Pathiannia a team-te chawlh a pek tawh pawh a sut leh vek a, Red Devils player-ten nuam ti takin chawlh an hmang dawn emaw an tih laiin training hautak an hmachhawn.

An la duhtawk lo cheu - coach Ten Hag-a'n, "Player thar kan mamawh a, lak ngei pawh kan tum a, theihtawp kan chhuah ang," tiin a squad-in thuam chak a mamawhzia a sawi a, a sawi ang ngeiin an che.

Red Devils hian rin loh takin Real Madrid legend Casemiro chu Old Trafford pan turin an hmin a, European champion team aṭangin mahni ram league-a la inhambuai tak team a zawm - United khai chhuah a tum dawn.

Ten Hag hian player dang pawh a la melh reng niin an sawi a, United-in indinthar tak tak an tum. Chumi hmaa pawimawh hmasa erawh zanina chak phawt a ni a, an tlawm leh ngat chuan an rim lai player tam takin pan an châk lo ang.

A harsa dawn
Liverpool hian season hmasa khan Old Trafford-ah United an lo ṭahtir tawh a, 5-0 ngawtin an sawp - team pahnih inhalzia thawnthu hi ziak dawn ila, lehkha phekin a daih lo a, lehkha tuiin a ziak zo thei lo.

United tan heti zata Reds laka tlawm hi a nat tehlul nen, Anfield-ah pawh thawnthu a danglam tam chuang lo a, 4-0 in an tlawm nawn. Inkhel hnuhnung aṭanga teh tur a nih chuan Red Devils hian Liverpool lakah 'chance' an nei lo.

Mahse, Liverpool boss Jurgen Klopp chuan, "Season hmasaa vawi hnih kan hneh khan, tun season atan kha result khan awmzia a nei dawn lo tih ka hre daih tawh. Season hmasa kan result ka ngaihtuah lo - kan tan a ṭangkai lo a, United chuan infuih nan an hmang thei mai thei.

"Kan intawnna hmasa nen chuan tuna kan inkhel tur hi a inang dawn lo - United hian thil zawng zawng an rawn thlak danglam thei a, an thlak lo mai thei bawk. A la hma deuh avangin United chungchang hriat tur kan la nei tlem hle. Red Devils khelh hi a awlsam ngai lo," a ti a, an hun tawn harsaah pawh a khingpui team a zah hle.

Ṭha bik lo
United chet chhiatna a rei tawh a, tun season an match hmasa pahniha an chak loh dan a lansarh lehzual avangin sawi an hlawh hle. Mahse, Klopp chuan an hun tawn thim lai taka United hmachhawn chu a châk loh zawk thu a sawi.

German coach chuan, "United hi 5-0 a an chak hlima hmachhawn ka châk zawk. Mahse, hei hi mumang ram thlen dik vekna hmun a ni bik lo," a ti a, Red Devils chu zuam sual thei an nih thu a sawi.

Klopp chuan sawi zawmin, "Keini pawh vawi hnih draw kan nei tawh a, tum kan châkawm zawk hial em? ka hre lo. Ngaihtuah tur thil tam tak a awm a, khawvel pumin kan inkhel hi an thlir dawn - team lian pahnihin eng angin nge kan hmachhawn chu kan la hria ang chu," a ti.

Liverpool hian Manchester City hneha Community Shield nomawi an chawi hnuah, league-a an match hmasa berah kai thar Fulham chu 2-2 in an inhnehtawkpui hram a, Anfield-ah Crystal Palace chu 1-1 in an draw bawk - an ropui bik lo hle.

Liverpool dinhmun
Reds hian hrem vangin Darwin Nunez an chhawr thei dawn lo a, mahse, hliam vanga Palace laka inlan lo Roberto Firmino chuan training a zawm leh tawh a, Mohamed Salah leh Luis Diaz nen an inkawp a beiseiawm.

Salah hian season hmasa khan league-a vawi hnih an intawnah goal nga a khung a, Old Trafford-ah hattrick siamin, Anfied-ah goal hnih a khung bawk a, zaninah pawh United tan ven bik a sual lo ang.

Chutihrual chuan Reds hian hliam vangin Joel Matip, Thiago Alcantara, Ibrahima Konate, Curtis Jones, Diogo Jota, Alex Oxlade-Chamberlain, Calvin Ramsay leh Caoimhin Kelleher an chhawr thei lo mek a, an talbuai hle.

Tlarhnung laiah Matip leh Konate an inhliam avangin Joe Gomez chu bul ṭan tura beisei a ni a, Virgil van Dijk nen an inkawp thei ang - inkhel tam lo Gomez hi United tlarhma tan a zuamawm mai thei.

Casemiro tel lohna
Brazilian midfielder ṭha mi Casemiro an neih dawn avangin United fan-te an phur a, a awm lo hran lo. Mahse, Real Madrid legend hian zaninah erawh Liverpool a la hmachhawn thei dawn lo a, a tel loa United an inlan mai a ṭul dawn.

Chutihruala United tana chanchin lawmawm tak chu Anthony Martial-a dam tawh chu a ni. Season hmasa lawka khelhna hmun chang phak lo forward hi pre-season ah a che ṭha a, mahse, hliam vangin tun season a la inlan lo thung.

Ten Hag-a'n a chhawr dan enin French forward hi a duh niin a lang a, zaninah a rawn inlan a nih pawhin a mak lo ang. Chutihrualin Jadon Sancho leh Marcus Rashford te nena goal nawr turin Cristiano Ronaldo a la awm ve reng tih hriat a ṭha.

Ten Hag-a'n Harry Maguire chu bench lama a thawn rinna lian tak a awm a, chuti a nih chuan Lisandro Martínez leh Raphaël Varane an inkawp thei ang - hei tak hi mipui hmuh châk chu a ni a, keini pawhin Old Trafford lam kan hawi ang - zan dar 12:30 hnu lamah chuan rawn ri lo la aw!

Klopp-a'n inkhelh ngei a duh
Manchester United fan-te chuan, club neitu Glazer chhungkua duh lohna zanin inkhelh hmain lantir an tum a, United fan-te chet dan avanga an inkhel thei dawn lo a nih chuan Jurgen Klopp chuan Liverpool-in point hmu mai se a duh thu a sawi!

Season hman zawh takah khan Old Trafford-a Liverpool an len dawnin United fan-ten buaina an siam a, hei vang hian inkhelh hun sawn tlai a ni - Klopp chuan inkhelh hun sawn leh ai chuan khelh loh tlang a, Liverpool lamin point an hmuh mai a duh.

Klopp chuan, "Inkhel tur tibuai khawpa buaina a chhuah loh hram ka beisei a, a chhuak leh a nih ngat chuan point min pek mai a ṭhain ka hria. United buaina hi keini tan buaina a ni ve lo a, an club ṭantuten he inkhel hi thleng lo tura an duh a nih chuan a khelh hun sawn khawtlai leh ṭhin hi awmzia a awm lo.

"Season tluanin game a tam em em a, chutiang buai tak kara fixture her rem ngai hi a buaithlak ṭhin. Old Trafford-ah inkhelh theih a nih ka beisei a, mahse, hetiang ang buaina hi a awm dawn a nih chuan buaina siam ve lo team khan point an hmu mai tur a ni," a ti.

United boss Erik ten Hag pawhin fan-ten lungawi lohna lantir an tum chungchang sawiin, "Club neitute pawhin hnehna chan an duh tih ka sawi duh a, fan-te pawh he club thlawp tlat tur hian kan duh a ni.
"A chang chuan fans lungawi lohna pawh hi ka hrethiam ṭhin hle. Mahse, tunah chuan thil zawng zawng hrethiam turin he club-ah hian ka la awm rei tawk lo - mahse, kan inlungrual a, theihtawp kan chhuah tlan erawh a ngai a ni," a ti a, fan-te chu a lungawi lo zawnga che lo a, club pui turin a sawm.

Ten Hag chuan Liverpool lakah a player-te chu theihtawp chhuah tura a duh thu sawi bawkin, "Keimahni ṭheuhin bul kan ṭan a ngai. Team anga kan khelh a, dan kan zam te zawm chung a, theihtawp kan chhuah a ngai a ni. Chutiang chu i ti a nih phawt chuan inrintawkna chu i nei mai ang," a ti a, a ṭang hle.