Jeremy leh Remsiami chawimawi ; Rs 25 lakhs leh 7.5 lakhs an pe

Commonwealth Games 2022 neih zawk taka India tana medal latu Jeremy Lalrinnunga leh Lalremsiami Hmar te chu Mizoram sorkarin a chawimawi a, an hlawhtlinna lawmpui nan leh hma lam an pan zel theih nan pawisa a pe bawk.

Weightlifting 67kg huangah gold medal latu Jeremy-a chu Rs 25 lakhs pek a ni a, hmeichhe hockey huangah bronze medal latu Remsiami chu Rs 7.5 lakhs pek a ni bawk, infiammi chhuanawm pahnih hian tun hma pawhin sorkar aṭangin sum leh hamṭhatna an lo dawng tawh.

Commonwealth Games bikah hian tun hmain Zoramthanga (boxer) leh Lalchhanhimi (weightlifting) te pawh an lo tel tawh a, mahse medal an la phak lo. Jeremy-a leh Remsiami te hi Mizo zingah CWG bika medal la hmasa an ni.

Goal neih a ngai
Jeremy Lalrinnunga hian kum kua chauh a nih laiin Mizoram a chhuahsan, kha tih laia Mizo mipui ten kan tuipui loh leh hriat lar vak loh weightlifting luhchilh turin a nu leh pa hmuh phak lohah a kal, tunah chuan India chauh ni loin khawvel hriat a hlawh ta.

Youth Olympic gold medal pawh la tawhtu Jeremy-a chuan, "Tu pawh hian tum kan neih a ngai, kan thil tumah ṭheuh chiang ila. Kan ṭhiante leh midangin an ti tih vang ringawta zui ve loin, talent kan neihna lamah goal kan neih a ngai in ka hria.

"Talent neih ringawt hi hlawhtlin nan a la tawk zo lo bawk, thuawihna leh thawhrimna a ngai tel bawk. Coach leh manager-te thu awih tak chungin kan awm a ngai a, a bak chu Pathian kutah ngah mai tur a ni," tiin a sawi.

Commonwealth Games neih lai khan Jeremy hi a tihrawl a hliam a, enkawl a ngai dawn. Nimin khan in enkawl turin Mizoram a chhuahsan - United States lamah a hliam hi enkawl a ni dawn a, kumin tawp lamah World Championship a hmachhawn leh ang.

Khelmual ṭha
Kolasib naupang, kawng sira hockey khel ṭhin kha Thenzawl Hockey Training Center-ah a inzir chhunzawm a, chumi aṭang chuan Lalremsiami hi India player pawimawh berte zinga mi a ni thei - a la ni chhunzawm zel bawk ang.

Khelmual ṭha a pawimawh thu sawiin Remsiami chuan, "CWG 2022-ah Mizo pahnih kan tel a, medal kan la thei a nih chuan Mizo ṭhalai tam takin an la thei ngei ang. Olympic medal-te hi hnam dang ta tur chauh a ni bik lo, keini pawhin lak kan ngam tur a ni ang.

"A bikin hockey-ah hian Mizo ten theihna kan nei tih ka hria, kan talent ti pung turin khelmual ṭha kan mamawh. A theih hram chuan Aizawl leh Kolasibah hockey ground ṭha nei thei ila a duhawm hle," tiin Mizoram sorkar hnenah hockey ground pawimawh thu a hrilh.

Mizo nula Remsiami hi Railways tana hna thawk lai a ni a, inkhelh thiam vanga hna hmu a ni. Kum 22 mi chauh la ni mah se India senior team tan match 98 a khel tawh a, goal 29 a khungsak der tawh - forward leh midfielder atan hman ṭhin a ni.