Usyk hmaah Joshua a tlawm leh tawh!

British boxer Anthony Joshua beiseina chu boruakah a thamral leh ta - kum 32 mi boxer hian WBA (Super), WBO leh IBF title a hloh tawh chu neih let tum mah se a nei let thei lo a, Oleksandr Usyk lakah split decision hmangin a tlawm.

Jeddah, Saudi Arabia-a inhnekah hian judge pahnihin Usyk hi 115-113 leh 116-112 in an chaktir a, judge pakhatin 115-113 in Joshua a chaktir thung - a khaikhawmna awlsam ber chu, "Usyk-a'n chak a phu zawk," tih chu a ni.

Joshua hian WBA (Super), WBO leh IBF title a hloh tawh neih let a tum chu a hlawhchham ta a, nikum September khan London khawpuiah Usyk hi hmachhawnin a title pathum hi a lo hloh tawh.

Usyk hian WBC champion Tyson Fury cho nghalin, "Tyson Fury hi a la chawl loah ka ngai a, min hmachhawn a duh ngei ang tih pawh ka hria. Kei pawhin ani hmachhawn hi ka duh a, Fury ka hmachhawn dawn lo a nih chuan fight neih chhunzawm a ṭulna ka hre lo," a ti!

Usyk a thiam
King Abdullah Sport City Arena-ah Joshua-a'n ṭantu a nei ṭha a, Usyk erawh a hming lam rik a nih rualin au elna thawm a ri tel - fan-te beisei ang ngeiin inhnek ṭantir lam a hmuhnawm nghal a, chungnung zawk thlan pawh a harsa nghal.

Round nganaah Joshua-a'n na zetin Usyk a hnek a, Ukrainian boxer hi a talbuai hman teuh hle. Mahse, kum 35 mi Usyk a beidawng duh lo - a rawn insiamṭha lehnghal a, round rukna cu a 'chanpual' tia chhal ngam a ni leh zui nghal.

Inhnek a rei telh telh a, trainer thar Robert Garcia hnuaia inzir Joshua-a'n hma a sawn tih hmuh turin awm mah se Usyk a thiam zawk a, a fing zawk bawk - inhnek a thunun telh telh a, round kuanaah Joshua a rawn tho chhuak ve leh dawn niin lang mah se Usyk 'game plan' zawk a ni tih a lang.

Round kuanaa theihtawp chhuaha Usyk 'attack' tu Joshua a chau zui a, a bak zawng chu Usyk ta a ni tawh - a tawpah chak zawkah puan a ni a, judge pathumin Ukrainian boxer hi chak zawkah puang vek pawh ni se a awm lo hran lo ang.

Joshua a chuai?
Anthony Joshua-a'n professional boxing-ah thawm a nei lian a, tlawm nei loa a kaltluan lai phei kha chuan heavyweight boxer ropui ber ni tura theihna nei hialah tam takin an ngai - mahse, beisei ang a ni zui ta lo hle.

Wladimir Klitschko meuh pawh lo hneh tawhtu Joshua hian vawi 22 inhneka a khingpui a hneh vek hnuah, June 1, 2019 khan hriat hlawh lo Andy Ruiz Jr. a hmachhawn a, rin loh takin a tlawm - WBA (Super), IBF leh WBO title a kawl lai chu a chân.

Mahse, Joshua a insiamṭha - December 2019-ah Andy Ruiz Jr. a hneh let a, boxer ṭha Kubrat Pulev a hneh zui bawk. Mahse, September, 2021 khan Usyk lakah a kawnghren pathum a hloh a, tunah neih let tum mah se, a mualphona belhchhahtu a chang leh ta.

Joshua hian inhnek zawhah awmze nei loin thu a sawi zui a, British boxer hi engtinnge a kal zel dawn, tih chu fan-te hriat châk a ni ta - tunah chuan a chhanna pek a harsa.

Eng nge a sawi?
Joshua hi result puan a nihin a lungawi lo tih a hriat a, mahse, inhnek entute chuan chak a phu lo tih an pawm tlang ang. Joshua chuan, "Ka zinkawng thawnthu hi in hriat chuan ka tuihalna hi in hrethiam ang. Kum nga mi lek ka nih laia boxer beiseiawm ka ni ve lo.

"Lung inah khungin ka awm a, ka chhuak a, theihtawp chhuahin training ka nei zui a ni," a ti a, Joshua chuan a khingpui chu fak zuiin, "Usyk hi fighter ṭha tak a ni," a ti - Joshua hian vawi 27 fight hmachhawnin vawi thum a tlawm ta a, vawi 24 a chak thung.

Joshua chuan sawi zawmin, "Kha aia ṭha zawk khan ti tur ka ni a, mahse, Usyk hi eng ang taka thawkrim nge a nih zaninah khan a langin ka hria - chuvangin kan heavyweight champion hi i lawmpui mai ang u," a ti a, a tlawm tih a pawm.

Hetihrual hian Joshua chuan, "Heavyweight boxer kalphung danglam bik ka ni a, ka rih bik avangin thawhrim lehzual pawh a ngai hle," a ti - Joshua hian thiam takin Usyk lawmpui mah se, a vawi hnih nana a tlawm chu a tuar thiam lo tih a lang.

Kan ram tan
Russia-in Ukraine a run avangin hmanni lawkah Usyk hi sipai thuam nen ram tan a inlan a, niminah erawh an hnam puanzar nen chhuang takin a title a chawisang a, Ukraine mipuite chuan mittui nen a chak lawm kha an en ang.

Usyk chuan, "Ka chhungte, kan ram, ka team leh kan ram chhanhim nana duty sipai zawng zawng te, in tan he hnehna hi ka hlan a, in chungah ka lawm takzet a ni," a ti a, a hlim lai berin an ram tana feh chhuakte a nghilh lo.

Kum 35 mi fighter chuan Fury cho chhunzawmin, "Pathian chauhin ani nena kan intawn dawn leh dawn loh chu a hria ang. Mahse, ka kianga awm tlat ka team-te hian min pui dawn a ni," a ti a, Fury hmachhawn ngei a tum.

The Gypsy King hminglem an pek Fury hian tun hnaiah a chawlh thu a puang leh tawh a, mahse, August 26 thleng WBC belt a kawl lai chu a kalsan dawn leh dawn loh tichiang turin hun a nei - vawi 20 inhneka vawi 20 chak thei Usyk nen an inhnek dawn leh dawn loh chu a hriat thuai ang.